Azərbaycanın Müdafiə Nazirliyi Rusiyanın Müdafiə Nazirliyinin rəsmi internet səhifəsində dərc olunan sülhməramlı kontingentinin rəsmi məlumatlarında yaşayış məntəqələrimizin adlarının hələ də uydurma erməni toponimləri ilə qeyd olunduğunu bildirib.

Nazirlik bu barədə xəbərdarlıq edərək vurğulayıb ki, Rusiya tərəfinin nəzərinə çatdırırıq ki, onların 26 noyabr 2022-ci il tarixli rəsmi məlumatında “Mardakert” və "Martuni" adlandırdıqları Azərbaycan yaşayış məntəqələrinin rəsmi adları uyğun olaraq AĞDƏRƏ və XOCAVƏNDDİR.

Bundan başqa Ermənistan tərəfi son 3 ayda atəşkəsi pozub və pozmaqda da davam edir. Noyabrın 27-si Rusiya sülhməramlılarının müvəqqəti yerləşdiyi Azərbaycan ərazisindəki qeyri-qanuni erməni silahlı dəstəsinin üzvləri tərəfindən Ordumuzun Ağdam, Xocavənd və Tərtər rayonları istiqamətlərində yerləşən mövqeləri də yenidən atəşə tutulub.

Bəs, necə olur ki, Rusiya sülhməramlılarının yerləşdiyi ərazi atəşə məruz qalır?

Ednews məsələ ilə bağlı deputat və politoloqun münasibətini öyrənib.

Millət vəkili Ceyhun Məmmədov qeyd edib ki, onlar bununla açıq şəkildə müharibənin bitmədiyi barədə mesaj verərək Ermənistanın sülh prosesinə başlamayacağını bildirirlər.

“İkincisi, onların əsas məqsədləri təxribat törədərək xarici mediaya, beynəlxalq qurumlara Azərbaycanın Ermənistan mövqelərini atəşə tutması kimi təqdim etməkdir. Əllərindəki hazır tezisləri, sənədləri ayrı-ayrı beynəlxalq qurumlara göndərirlər ki, guya Azərbaycan bu addımı atıb. Üçüncü isə bir sıra dövlətlərin burada maraqlı olmasıdır. Rusiya sülhməramlıları bölgədə üzərinə düşən vəzifələri yerinə yetirmirlər. Ermənilər də bundan istifadə edirlər. Təbii ki, bu, qəbul edilən deyil. Azərbaycan bu məsələni davamlı olaraq müxtəlif platformalarda müzakirəyə çıxarır və biz inanırıq ki, beynəlxalq qurumlar da bu məsələyə öz münasibətlərini bildirəcəklər. Təəssüf ki, Ermənistan 44 günlük müharibədən nəticə çıxarmadı və bu gün də hazırlıqlarını davam etdirir”.

Politoloq Qabil Hüseynli açıqlamasında bildirib ki, rus sülhməramlıları özlərini açıqca Azərbaycana meydan oxumaq vəziyyətinə gətiriblər. Onlar özlərinin tərəfsiz olmaları haqqında sülhməramlılara xas olan keyfiyyətlərdən tamam uzaqdırlar”.

“Ruslar bölgədə qarşıdurmanı, gərginliyi artırmaq istəyirlər. Üstəlik də siyasi məsələlərlə məşğul olmağa başlayıblar. Yeni siyasi xəritələr tərtib edirlər, sayt açırlar, Rusiya mərkəzi yaradırlar. Sözün həqiqi mənasında bütün beynəlxalq hüquq normalarını pozublar. Bizim dəfələrlə onlara xəbərdarlığımıza, Hətta Prezident səviyyəsində onların ünvanına tənqid səsləndirilməsinə baxmayaraq onlar bundan nəticə çıxarmırlar. Əksinə mərkəzdən məlumat alırlarmış kimi vəziyyəti daha da kəskinləşdirirlər. Ona görə də rus sülhmərmalılarının Azərbaycan ərazisindən çıxarılması haqqında məsələ yetişib. Prezident İlham Əliyev çıxışlarında da buna eyham vurub. Güman edirəm ki, Azərbaycan tərəfi ortaya  onların ərazimizdən çıxarılması barəsində qəti mövqe qoya bilər”.

Oğuz Ayvaz