Son vaxtlar Türkiyə Suriya və İraqda anti-terror əməliyyatlarını intesvləşdirməyə başlayıb. Bununla belə, Türkiyənin terrora qarşı fəallıq göstərməsi ABŞ-ı olduqca narahat edir. Hətta Pentaqon rəhbəri Lloyd Ostin Türkiyə Müdaifə naziri Hulusi Akarla telefon danışıqları zamanı Türkiyə hərbi qüvvələrinin Suriyadakı mümkün əməliyyatına qarşı olduqlarını söyləyib. 

ABŞ-ın narahatlığının əsas səbəblərini Ednews-a şərh edən türkiyəli siyasi analitik Göktuğ Çalışkan ilk növbədə bunu ABŞ-la PKK-nın ilginc münasibətləri ilə əlaqələndirib. 

“İstanbulda ötən günlərdə baş verən və PKK-nın bilavasitə iştirak etdiyi təsdiqlənən terror əməliyyatı, habelə sərhəd məntəqələrimizə adı çəkilən terrorçu təşkilat tərəfindən atılan raket zərbələri, eyni zamanda orada həyatını itirən mülki şəxslər hər kəsə məlumdur. Lakin ABŞ-ın PKK-YPG terrorçu təşkilatlarını müdafiə etməsi işin ən mürəkkəb tərəfidir”,- deyə analitik bildirib. 

Göktuğ Çalışkan əlavə edib ki, ABŞ müxtəlif bəhanələr gətirərək, PKK-YPG qruplaşmalarını Suriyada müdafiə etməyə çalışır. 

“Maraqlı budur ki, ABŞ açıq şəkildə Türkiyəyə qarşı terrorçu əməliyyatlarda təqsirli bilinən PKK-YPG kimi təşkilatlara milyardlarla dollar pul xərcləməkdədir. Son günlərdə Türkiyənin həyata keçirdiyi “Pəncə-Qılınc” anti-terror əməliyyatları zamanı çox sayda gizli terrorçu sığınacaq və məntəqələri məhv edilib. 

ABŞ isə iddia edərək qeyd edir ki, PKK-YPG ona İŞİD-lə mübarizə aparmaq üçün həmin bölgədə gərəklidir. Hələ üstəlik ABŞ artıq 40 ilə yaxındır ki, İŞİD-lə mübarizə adı altında Türkiyənin təhlükəsizliyənə xələl gətirən PKK-YPG təşkilatına külli miqdarda maliyyə vəsaiti xərcləyir. Bu da təbii ki, ABŞ-ın Türkiyəyə qarşı terroru dəstəkləməsi kimi də anlaşıla bilər”. 

Elnur Ənvəroğlu