ABŞ Dövlət Departamenti bildirib ki, Azərbaycanla Ermənistan arasında yekun razılaşma əldə edilməkdədir. Həmçinin ötən gün Moskvada Azərbaycan, Rusiya və Ermənistan liderlərinin üçtərəfli zirvə görüşü olub.
“ABŞ-ın sülh prossesi ilə bağlı dəqiq məlumatı var. Çünki bilavaistə bu danışıqların içindədir”.
Bu fikirləri Ednews-a açıqlamasında politoloq Natiq Miri səsləndirib. O, qeyd edib ki, 4 günlük Vaşinqton görüşündə prinsipial bir çox məsələlər razılaşdırıldı. Ardınca isə Brüssel görüşü təşkil olundu.
“Burada da müəyyən yaxınlaşmalar mümkün oldu. Artıq dəqiq rəqəmlərlə danışıqlar aparılıb. Bura qədər olan məsələlər prinsipialdır. Bundan sonrakı məsələlər isə detallar və texniki məsələlərdir. Əslində Ermənistan da bu detallarla manipulasiya etməyə davam edir. Ermənilər detallardan istifadə edərək danışıqları uzatmağa çalışır. Həmişəki kimi ikitərəfli oyun oynayır. Ərazi bütövlüyü təmin olunduqdan sonra Laçın dəhlizi anlayışının heç bir əhəmiyyəti qalmadı. Moskva görüşündə isə bu məsələnin bir daha qaldırılması onu göstərirdi ki, Putin publikayaya oynayır”.
Politoloq Moskva görüşünün Azərbaycan-Ermənistan münasibətlərinin düzəlməsi üçün yekun olmadığını vurğulayıb:
“Sülh müqaviləsinin imzalaması üçün xeyli məsafə var. Qarabağ məsələsi hələ ki danışıqlardan praktikaya keçməyib. Çünki sözdə ərazi bütövlüyünü tanımaqla məsələ həll olunmur. Azərbaycanın ərazi bütövlüyünü tanıyan ölkə separtçı rejimi maliyyələşdirməz. Sülh danışığını əngəlləyən ən ciddi problemlərdən biri separtçı rejimin bizim ərazilərdə olmasıdır. Digər tərəfdən ərazilərin qaytarılması, dəqiqləşdirilməsi məsələləri var”.
Siyasi analitik həmçinin, bildirib ki, ərazilərin qaytarılması, dəqiqləşdirilməsi məsələ 1-2 günün işi deyil.
“Əsaslar üzrə sərhədlərin məsafəsi razılaşdırılmalıdır. Bu yöndə xeyli məsafə qət etmək lazımdır. Moskva görüşü bir növ Zəngəzur dəhlizi ilə bağlı kommunikasiya açılmasında irəliyə doğru addım ola bilər. Bu yöndə də dəqiq qərar məlum olmayıb. Moskvada Azərbaycan, Rusiya və Ermənistan baş nazirlərinin müavinləri üçtərəfli görüşü keçiriləcək. Moskva görüşü yekun görüşə aparacaq yol deyil. Çünki razılaşdırılmalı xeyli məqamlar var”.
Aysel Şahmar
