Avropa Siyasi Birliyinin növbəti iclası iyunun 1-də Moldovanın paytaxtı Kişinyovda keçiriləcək. Görüşün məqsədi sülhün möhkəmləndirilməsi və Avropanın ümumi maraqlarının müdafiəsidir.
Kişinyovda keçirilən Avropa Siyasi Birliyinin ikinci zirvə görüşü Azərbaycana nələr qazandırır?
Məsələ ilə bağlı politoloq Cümşüd Nuriyev Ednews-a açıqlamasında bildirib ki, bur görüşdən də əvvəl Ermənistanın təxribat törətdiyini müşahidə etdik:
“Görüş çərçivəsində Azərbaycan və Ermənistan arasında sülh sazişinin imzalanacağı məsələsi olmayacaq. Çünki hər hansısa görüşdən əvvəl Ermənistan sərhəddə təxribat törədir. Öz xislətini göstərir. Dünən də bunun şahidi olduq. Görüşün Azərbaycan üçün yeganə müsbət tərəfi odur ki, öz həqiqətlərimizi dünyaya bir daha bəyan edəcəyik. Azərbaycan dünyada öz sözünü və gücünü göstərmiş ölkədir. Bu da bir növ Ermənistana dünya dövlətlərinin təzyiqi kimi də dəyərləndirilə bilər”.
Politoloq ABŞ-ın sülh sazişi məsələsində olduqca fəallaşdığını vurğulayıb:
“Əsas məqsəd ondan ibarətdir ki, iki dövlət arasında sülh sazişi imzalansın, Cənubi Qafqazda da Rusiyanın hökmranlığına son qoyulsun. Ermənistan elə bir dövlətdir ki, onun dövlətçilik ənənəsi yoxdur. Nəzərə alsaq ki, Paşinyan kifayət qədər qeyri-peşəkar siyasətçidir. Nə qədər ki, Moskvanın fitnəsi davam edir, belə bir sazişizin imzalanması böyük bir sual altındadır. Azərbaycan böyük antiterror əməliyyatı keçirərsə ondan sonra Ermənistan dərhal sülh sazişi imzalayacaq”.
Cümşüd Nuriyev 28 May Müstəqillik Günündə Prezident İlham Əliyevin Laçın şəhərinə səfərində Azərbaycanın mövqeyini, iradəsini, gücünü, əzmini ortaya qoyduğunu qeyd edib.
“Ölkə başçısı son mesajlarını artıq verib. Ermənistanın ağlı olarsa bu sözlərdən nəticə çıxarar. Amma ağılı özlərində deyil ya Moskvada, ya da Parisdə axtarırlar. Antiterror əməliyyatının olacağı birmənalıdır. Azərbaycan Prezidentinin verdiyi mesajlar onu göstərir ki, payıza qədər antiterror əməliyyatı gözlənilən hərəkətdir”.
Qeyd edək ki, Avropa Siyasi Birliyinin 2-ci zirvə görüşünə Kişinyovda 47 dövlət, hökumət və Aİ qurumunun başçılarını qəbul ediləcək.
Xatırladaq ki, birinci zirvə görüşü oktyabr ayında Praqda keçirilib. Tədbirdə Azərbaycan Prezidenti İlham Əliyev də iştirak edib.
Aysel Şahmar
