“Xocalı rayonunun mərkəzində hal-hazırda Rusiya dövlətinə məxsus hərbi kontigent özünün qərargahını yaradıb. Oranı özü üçün dayaq nöqtəsi seçib. Mən onlara sülhməramlı demirəm. Onların gəldikləri gündən bəri hesab edirlər ki, bura onların dədə-baba torpağıdır. Xocalı aeroportu və onun ətrafında olan ərazidə onlar özlərinə kilsə də tikiblər. Dədə-babalarının heykəllərini də qoyublar. Min oyundan çıxıblar və 44 günlük müharibə dövründə, ondan əvvəl də müəyyən yerlərdən qaçmış erməniləri də gətirib Xocalı şəhərində yerləşdiriblər. Onlara evlər tikiblər və tikməyə də davam edirlər”.
Bu sözləri Ednews-a deputat Elman Məmmədov deyib. Onun sözlərinə görə, 30 ildən çox ermənilərin yaratdığı cinayətkar, separatçı, terrorçu qurumun rəsmiləri də artıq dava-dava deyirlər. Yəni, bunlar Azərbaycanın heç bir təklifinə, sülh çağırışına tabe olmaq olmaq istəmirlər:
“Müxtəlif mitinqlər aparır, yürüşlər, hərbi təlimlər keçirir, silahlanır, yenidən səngərlər qazırlar. Təbii ki, bu məsələdə onlar tək deyillər. Rus hərbi kontigentin iştirakı ilə bütün bunlara həyata keçir. Özlərini dırnaq arası sülhməramlı adlandıran bu hərbi kontigent ərazimizə gəldiyi gündən separatçılarla, terrorçularla əməkdaşlıq edirlər. Bu gün də əməkdaşlıqlarına davam edirlər. Baxmayaraq ki, Azərbaycan dövlətinin rəhbərliyi çox ciddi etirazlarını bildirir. Rusiyaya bu barədə etirazlar, bəyanatlar verilir. Bunların məqsədi separatçı qurumu qoruyub saxlamaqdır. Bu da onlar üçün yox öz mənafeyləri üçündür. Öz mövqelərini Azərbaycanda saxlamaq üçün separatçı qurum mövcud olmalıdır. Onlar istəmirlər ki, terrorçular Azərbaycana tabe olsunlar. İstəyirlər ki, müəyyən gərginliklər yaransın, təxribatlar, xoşagəlməz hadisələr meydana gəlsin”.
Millət vəkili hesab edir ki, əgər Ermənistan sülh istəmirsə onda Azərbaycanın bir yolu qalır:
“Hərbi gücümüzdən istifadə edib ərazimidə kök salmış separatçıları çıxarsın. Burda həm rus, həm də erməni silahlı birləşmələrini nəzərdə tuturam. Onlar tamamilə ərazimizdən təmizlənməlidirlər. Ərazimizdə yaşayanlar qanunlarımıza tabe olurlarsa qalıb yaşasınlar. Yox, əgər qəbul etmirlərsə yolları açıqdır.
Bizim hər birimiz hər saniyə, hər dəqiqə Xocalıya qayıdıb, orda yaşamaq həsrətindəyik. Biz bu anı gözləyirik. Biz Xocalının işğaldan azad edilməsini gözləyirik. Biz yurd-yuvamıza qayıdacağımız günü gözləyirik. Tək Xocalılar yox, Xankəndililər də, Xocavəndlilər də, Ağdərəlilər də bu həsrətlə yaşayır. Hamımız bu arzu ilə yaşayırıq”.
Oğuz