“Azərbaycan hər üç formatın heç birindən indiyə qədər imtina etməyib, ermənilərin təşəbbüsü ilə keçirilən danışıqlarda iştirak edib və sülh danışıqlarında iştiraka hazır olduğunu dəfələrlə bəyan eləyib. Azərbaycan üçün bu gün də bu üç format qəbul ediləndir, Azərbaycan haqlı, ədalətli mövqedə olduğu üçün hər üç format Azərbaycan üçün fərq etmir”.
Bu sözləri Ednews-a politoloq Murad Sadəddinov Azərbaycan və Ermənistan arasında sülh anlaşmasından danışarkən bildirib. Onun sözlərinə görə, Azərbaycanın ədalətli haqlı tərəf olması kifayət qədər əsas verir ki, istənilən platformada mövqeyimizi müdafiə edə bilsin. Amma Ermənistan üçün bunları söyləmək mümkün deyil:
“Ermənistan özünü daha çox Avropa İttifaqı və Vaşinqton formatlarında komfortda hiss edir. Paşinyan hesab edir ki, Rusiya formatında danışıqlar onun ziyanına olacaq, çünki bu gün Rusiya-Ermənistan münasibətlərində gərginlik yaşanır. Ona görə də hesab edirəm ki, Paşinyan danışıqlar üçün əsas üstünlüyü Avropa İttifaqı və ya Vaşinqton formatına verəcək. Lakin son hadisələrdə Avropa İttifaqının bizə qarşı qərəzli, beynəlxalq hüquqa uyğun gəlməyən mövqe ortaya qoyub. Ermənistanı müdafiə etməsi faktı Bakının onlardan haqlı narazılığına səbəb olub. Yəqin ki, Azərbaycan Avropa İttifaqı formatına öz iradını bildirəcək. ABŞ-ın dövlət katibinin xanım müavininin Senatda Azərbaycana qarşı ədalətsiz, beynəlxalq qanunvericiliyə və Azərbaycan suverenliyinə qarşı fikirlər səsləndirməsi də Azərbaycan tərəfindən qulaqardına vurulmayacaq. Şübhəsiz ki, Vaşinqton formatında danışıqlarda bu narazılığımız da ifadə olunacaq”.
Politoloq qeyd etdi ki, Ermənistan tərəfinin spikerləri vasitəsilə Azərbaycan Prezidenti və Ermənistan Baş nazirinin növbəti görüşündə irəliləyişə nail olmaq üçün tam hazır olduqlarını bəyan etməsi İrəvanın düşdüyü hazırkı durumdan irəli gəlir. Amma yenə də bunun arxasında erməni xisləti var:
“Ermənistan bir tərəfdən danışıqlara hazır olduğunu bəyan edir, o biri tərəfdən xarici işlər naziri Ararat Mirzoyan BMT Təhlükəsizlik Şurasının iclasında Azərbaycana iyrənc böhtanlar yağdırır, iki xalq arasında düşmənçiliyi qızışdıran sərsəm fikirlər səsləndirir. Bu cür mövqedə olan xarici işlər naziri mövcud olduqca danışıqlarda irəliləyiş əldə etmək çətindir. Ona görə də əgər Paşinyan sülh danışıqlarında həqiqətən maraqlıdırsa, xarici işlər nazirini istefaya göndərməlidir. Hesab edirəm ki, Paşinyan Mirzoyan kimi qızışdırıcı mövqedə olan adamı istefaya göndərəcək və sülh danışıqları yeni bir normal xarici işlər naziri ilə davam etdiriləcək. Paşinyan 10 noyabr üçtərəfli bəyanatdan irəli gələn bütün məsələlərin həyata keçməsi üçün real addımlar atmalıdır. Ermənistan üzərinə götürdüyü öhdəlikləri yerinə yetirməlidir. Ermənistan öhdəlikləri xoşluqla yerinə yetirməlidir. Bu onun özü üçün də faydalı olar. Vaxt udmaq, yayınmaq taktikasının sonda Ermənistanın özünə zərər vurduğuna, nəhayət, Paşinyan əmin olsa, problem həllini tapa bilər”.
Qeyd edək ki, oktyabrın 5-də İspaniyanın Qranada şəhərində Azərbaycan Prezidenti İlham Əliyevlə Ermənistanın Baş naziri Nikol Paşinyan arasında görüş keçiriləcək. Bunu Ermənistan Təhlükəsizlik Şurasının mətbuat xidməti bəyan edib. Məlumata görə, bundan əvvəl, sentyabrın 26-da Brüsseldə Ermənistan Təhlükəsizlik Şurasının katibi Armen Qriqoryan və Azərbaycan Prezidentinin köməkçisi Hikmət Hacıyevlə, bu danışıqların hazırlanması çərçivəsində Makron, Şolts və Mişelin müşavirləri ilə görüş keçiriləcək.
Oğuz