Xəbər verdiyimiz kimi Fransa Gürcüstan üzərindən Ermənistana hərbi texnika göndərib. Belə ki, Fransanın Ermənistana göndərdiyi hərbi texnika Gürcüstandan keçərək Ermənistana göndərilib. Bundan başqa Ermənistan silahlı qüvvələri üçün nəzərdə tutulan “Acmat” şirkətinin istehsalı olan “Bastion” çoxməqsədli zirehli texnikası bu gecə Gürcüstanın Poti limanına yola salınıb. 

Maraqlıdır, bu hadisə illərdir Azərbaycanla Gürcüstan arasında formalaşan müttəfiqlik münasibətlərinə necə təsir göstərəcək?  

Məsələ ilə bağlı Ednews-a danışan siyasi ekspert Gia Xuxaşvilinin fikrincə, bu Gürcüstan-Azərbaycan münasibətlərinə mənfi təsir göstərməyəcək.

“Düşünmürəm ki, Ermənistan yaxın gələcəkdə Azərbaycana qarşı qisas illüziyasına düşsün. Asanlıqla deyə bilərik ki, ölkə İkinci Qarabağ müharibəsindən bir neçə əsrlik bir dərs alıb. Fikrimcə, bu silahlanma ölkənin müharibədə itirilən təchizatlarının bərpa olunması üçün həyata keçirilir. Bunun hərbi yox, siyasi əhəmiyyətini araşdırmaq daha məntiqli olardı. Hamıya aydındır ki, Ermənistan Rusiyaya qəzəblidir və buna görə də alternativ bir hərbi-siyasi yoldaş axtarır. İkinci Qarabağ müharibəsində özünün çoxdankı “müttəfiqi” olan Rusiyadan dəstək gözləyən İrəvanın bu yöndə xəyalları puç olub. Müharibədən sonra zəifləmiş Ermənistan Fransa ilə əməkdaşlığı genişləndirərək bəzi ölkələrə siyasi mesaj verməyə çalışır. Beləliklə, Ermənistan rəsmiləri göstərmək istəyirlər ki, artıq onlar Rusiyadan asılı deyillər və onların dünyada azad, çoxyönümlü siyasi manevr qabiliyyətləri var”.

Ekspert həmçinin qeyd edib ki, hazırda Gürcüstan NATO-ya üzv olmaq üçün çalışır və bu səbəbdən də Fransa ilə əlaqələri genişləndirmək istəyir.

 “Bu səbəbdən ölkənin Avropa ilə yaxın gələcəkdə daha sıx siyasi əlaqələrinin yaranması gözlənilir. Elə bu səbəbdən də Gürcüstan Qərb dövlətləri ilə yaxınlıq etmək istəyir. Bunun Gürcüstan-Azərbaycan münasibətlərinə mənfi təsir bağışladığını düşünmürəm”.

Fərid Axund