Qarabağ münaqişəsi başlayandan Ermənistan bütün nöqteyi-nəzərdən regionda özünü çətin vəziyyətə salıb. Ölkənin region ölkələri ilə sağlam münasibətlərinin olmaması onun tənəzzülü kimi qiymətləndirilə bilər.
Ermənistanın regionda uzun illərdir davam edən könüllü blokadası onun sosial-iqtisadi vəziyyətinə necə təsir edib?
Məsələ ilə bağlı Ednews-a danışan erməni politoloq İşxan Verdyan Ermənistanın son illərdə apardığı siyasətin ölkə üçün nə dərəcədə zərərli olduğundan bəhs edib:
“Ermənistan bütün iqtisadiyyatının üzərində dayandığı Rusiya ilə könüllü blokadasını kompensasiya etməyə çalışır. Ölkədə sosial-iqtisadi vəziyyət blokada nəticəsində deyil, ölkədə iqtisadi fəaliyyətin demək olar ki, bütün spektrini əhatə edən geniş yayılmış korrupsiya və biznes inhisarçılığı nəticəsində pis vəziyyətə düşüb. Nikol Paşinyanın hakimiyyətə gəlişi ilə monopoliyalara son qoya bilməsə də, iqtisadiyyat sərbəst nəfəs almağa başladı. Əlavə olaraq, o Rusiyaya bağlı logistika Ermənistanın iqtisadi artımını kifayət qədər təmin edə bildiyini sübut etdi. Paşinyanın xarici siyasət arenasında öyünməyə heç nəyi olmadığı halda, onun iqtisadi sahədə uğurları ölkə daxilində göz qabağındadır”.
Ermənistanın son vaxtlar Rusiya ilə zəif münasibətləri onun iqtisadiyyatı və siyasəti üçün necə təhlükə yaradır sualına da münasibət bildirən ekspert qeyd etdi ki, Paşinyan hakimiyyətinin mənfi cəhətlərindən bəhs etsək ilk növbədə ölkənin sadəcə bir neçə ölkə ilə sıx xarici ticari münasibətlərə sahib olduğunu qeyd etmək lazımdır:
“Ermənistanın iqtisadi təhlükəsizliyi Rusiyaya bağlı olduğundan, Rusiya ilə münasibətlərin kəskinləşməsi Ermənistanı dağılmaq təhlükəsi ilə üz-üzə qoyur. Əgər Rusiya qəfildən Ermənistanı düşmən ritorikasına görə cəzalandırmaq qərarına gəlsə, o zaman Ermənistanı sözün hərfi mənasında daş dövrünə qərq edə bilər. Məhz bu məqamda Ermənistanın özünü saldığı blokada öz bəhrəsini verəcək - Rusiyadan malların tədarükü dayanarsa, o zaman malları əvəz edəcək heç bir alternativ olmayacaq. Paşinyan hökumətinin Azərbaycana qarşı davam edən düşmənçilik siyasəti iqtisadi əlaqələrin şaxələndirilməsi üçün bütün mümkün variantları artıq əngəlləyib. Məhz buna görə də, Paşinyanın Azərbaycana və Rusiyaya qarşı qeyri-dost siyasəti eyni zamanda çaşqınlıq yaradacaq dərəcədə qeyri-peşəkardır. “Oturduğun budağı kəsmə” məsəli Baş Nazirin davranışını çox gözəl səciyyələndirir. Əgər Ermənistan Azərbaycanla münasibətlərində heç nəyi dəyişmədən Rusiyadan uzaqlaşsa ölkənin vəziyyəti daha da pisləşəcək”.
Politoloqun sözlərinə görə, Rusiyada Ermənistandan daha çox erməninin olması mübahisəli bəyanatdır:
“Buna baxmayaraq, Rusiyadakı erməni diasporu kifayət qədər təsirlidir və nadir istisnalarla Rusiyanı tam dəstəkləyir. Rusiyada yaşamış ermənilərin Rusiya vətənpərvərliyi nümayiş etmələri olduqca normal haldır. Beləliklə, Rusiya erməniləri bütün mümkün platformalardan açıq-aşkar dost olmayan jestləri ilə Nikol Paşinyanın davranışını tənqid edirlər. Ola bilsin ki, bu insanlar 2000-ci illərin ortalarında gürcülərin Rusiyadan kütləvi deportasiyasını yaxşı xatırlayaraq öz gələcəklərindən narahatdırlar. Buna görə də, Rusiya ilə münasibətlərin zəifləməsinə yol açan siyasət yürütdüyünə görə Rusiya erməniləri Paşinyan rejimini kəskin qınayırlar. Rusiyada yaşayan ermənilər Paşinyanın hakimiyyətinin tezliklə sonlandırılması tərəfdarıdırlar”.
Fərid Axund
