“Türk dövlətləri arasında vahid iqtisadi və nəqliyyat platformasının əsasının qoyulması üçün kifayət qədər əmək və zaman lazımdır. Amma nəqliyyat dəhlizinin yaradılması istiqamətdə artıq ciddi addımlar atılmaqdadır”.
Bu sözləri Ednews-a politoloq Oqtay Qasımov Cənubi Qafqazda, həm də Mərkəzi Asiyada türk dövlətləri arasında vahid regional iqtisadi, enerji və nəqliyyat platformasının formalaşması barəsində fikir bildirərkən deyib. Onun sözlərinə görə, Mərkəzi Asiya ölkələri ilə Azərbaycan arasında münasibətlər kifayət qədər yüksək səviyyədədir.
“Qazaxıstan-Azərbaycan-Türkiyə üçlüyü çərçivəsində Transxəzər beynəlxalq nəqliyyat dəhlizi layihəsi, o cümlədən Qırğızıstan-Özbəkistan-Türkmənistan üzərindən dəmir yollarının çəkilməsi və bunun Çinin dəmir yolları ilə birləşdirilməsiylə bağlı mühüm işlər görülür. Türk Dövlətləri Təşkilatına üzv olan ölkələr “Orta dəhliz”in inkişafında maraqlıdır və Zəngəzur dəhlizinin açılmasını dəstəkləyirlər. Bu baxımdan türk ölkələrinin vahid nəqiliyyat platforması yaratmaq üçün münasib və geniş imkanları var. Artıq Azərbaycan və Türkiyə belə bir layihəni həyata keçiriblər. Bakı-Tbilisi-Qars dəmir yolu mühüm regional nəqliyyat prioritetinə çevrilib”.
Politoloq qeyd etdi ki, hazırda Qazaxıstan neftinin əhəmiyyətli bir hissəsi Azərbaycan üzərindən Türkiyə və Avropaya daşınmaqdadır:
“Bununla bərabər, Qazaxıstanın Xəzər dənizindəki limanları, həmçinin Türkmənistanın Türkmənbaşı limanı ilə Azərbaycanın Ələt limanı arasında bağlantıların qurulması üçün birgə əməkdaşlıq daha da intensivləşib. Qarşılıqlı iqtisadi əlaqələrə gəlincə, Azərbaycanın türk dövlətləri ilə ticarət dövriyyəsi keçən ilə nisbətən 40 % artıb. Bu, olduqca ciddi bir rəqəmdir. Azərbaycanın türk dövlətlərində yatırdığı investisiya 20 milyard dolları keçib. Qazaxıstan, Qırğızıstan və Özbəkistan ilə ticarət dövriyyəsinin daha da artırılması nəzərdə tutulur. Azərbaycan-Özbəkistan İnvestisiya Fondunun əsasının qoyulması ikitərəfli iqtisadi əməkdaşlıqda önəmli nailiyyət kimi qiymətləndirmək olar. Yəni hər iki istiqamətdə zəruri addımlar atılır. İstərdik ki, Türk Dövlətləri Təşkilatı Avropa İttifaqına bənzər və ya ondan daha konstruktiv formatda fəaliyyət göstərsin”.
Oğuz