Türkiyənin xarici işlər naziri Hakan Fidan NATO-nun Ankarada keçirilən zirvəsinin uğurla başa çatdığını bildirib.
EDnews xəbər verir ki, bu barədə Hakan Fidan sosial şəbəkədə paylaşım edib.
Paylaşımda zirvədə alyansın bütün üzv ölkələrinin lider səviyyəsində təmsil olunmasının Türkiyəyə və Prezident Rəcəb Tayyib Ərdoğana göstərilən etimadın göstəricisi olduğunu vurğulanıb.
Nazir qeyd edib ki, sammit NATO-nun transformasiya prosesinin müzakirə olunduğu mühüm bir dövrdə baş tutub və görüşlər zamanı Avro-Atlantik təhlükəsizliyinə dair əsas məsələlər ətrafında geniş fikir mübadiləsi aparılıb. Onun sözlərinə görə, "NATO 3.0" konsepsiyası çərçivəsində daha güclü NATO və daha güclü Avropanın təməli qoyulub.
Hakan Fidan Türkiyənin 22 ildən sonra NATO Zirvəsinə ev sahibliyi etməsinə verdiyi dəstəyə görə Prezident Rəcəb Tayyib Ərdoğana, həmçinin NATO-nun baş katibi Mark Rutte və müttəfiq ölkələrin xarici işlər nazirlərinə təşəkkür edib.
Türkiyəli nazir sonda Ankara Zirvəsinin həm Türkiyə, həm də NATO müttəfiqlərinin təhlükəsizliyi və rifahı baxımından mühüm nəticələr verəcəyinə əminliyini ifadə edib.
