Ermənistanın xarici işlər naziri Ararat Mirzoyan seçkilərdə iştirak üçün daimi yaşayış yeri tələbinin tətbiq olunmasını təklif edib.
EDnews “Sputnik Ermənistan”a istinadən xəbər verir ki, bunu seçki kampaniyası ilə əlaqədar məzuniyyətdə olan Ermənistanın xarici işlər naziri Ararat Mirzoyan jurnalistlərə açıqlamasında bildirib.
Mirzoyan sosial şəbəkələrdə Ermənistan vətəndaşlarının xaricdən səs vermək üçün ölkəyə gəldiyini əks etdirən görüntülərə münasibət bildirib.
Onun sözlərinə görə, seçkilərin nəticələrindən sonra Seçki Məcəlləsinin təkmilləşdirilməsi məsələsinə baxmaq lazımdır.
“Əlbəttə, hüquqi baxımdan bu mümkündür: bir neçə il başqa ölkədə yaşamaq, sonra bir neçə saatlıq gəlmək, səs vermək və getmək. Lakin siyasi baxımdan bu, son dərəcə məsuliyyətsizdir və belə bir mövqeyi anlamaq çətindir”, – deyə Mirzoyan bildirib.
Nazir qeyd edib ki, seçki qanunvericiliyinə son üç ildə ən azı altı ay Ermənistanda daimi yaşamaq tələbi daxil edilə bilər.
Bununla belə, Mirzoyan vurğulayıb ki, bu, onun şəxsi fikridir və hələlik hakim “Mülki Müqavilə” partiyası daxilində müzakirə olunmayıb.
“Əks halda, belə çıxır ki, vətəndaşlarımız bir neçə saatlıq xaricdən gəlib gələcəyimizlə bağlı qərarlar qəbul edə bilərlər”, – deyə o əlavə edib.
Ararat Mirzoyan həmçinin seçkilərdə yüksək fəallıq olacağına əminliyini ifadə edib.
Onun sözlərinə görə, seçki kampaniyası zamanı vətəndaşların ölkə qarşısında duran əsas vəzifələrin, o cümlədən sülh gündəliyinin həyata keçirilməsi və balanslaşdırılmış xarici siyasət aparılması məsələlərinin əhəmiyyətini dərk etdikləri müşahidə olunub.
Qeyd edək ki, iyunun 7-də Ermənistanda parlament seçkiləri keçirilir və seçkilərdən sonra yeni hökumət formalaşdırılacaq.
Ermənistanda 2 milyon 485 min 851 vətəndaşın səsvermə hüququ var.
Seçkilərdə 2 blok və 16 partiya iştirak edir.
Partiyalar üçün keçid həddi 4 faiz, üç partiyaya qədər olan bloklar üçün 8 faiz, dörd və daha çox partiyadan ibarət bloklar üçün isə 10 faiz müəyyən edilib.
Minimum seçici fəallığı ilə bağlı tələb nəzərdə tutulmayıb.
