ABŞ Dövlət katibi Marko Rubio İsrailin Vaşinqton və Tehran arasında əldə olunan razılaşmanı pozmağa çalışdığına dair iddiaları təkzib edib.
EDnews xəbər verir ki, Rubio Küveytdə jurnalistlərə açıqlamasında ABŞ-nin Yaxın Şərqdəki bütün tərəfdaşlarının Vaşinqtonun İranla bağlı hansı istiqamətdə çalışdığını yaxşı bildiyini deyib:
“Bunu haradan aldığınızı bilmirəm. Biz bu məsələ üzərində işləyirik. İsraillilər tam olaraq nə üzərində işlədiyimizi bilirlər. Regiondakı bütün tərəfdaşlarımız da bundan xəbərdardır. Hər kəs Prezident Donald Trampın bu məsələdə qırmızı xətlərini və mövqeyini anlayır”, – deyə Rubio bildirib.
Dövlət katibi İsrailin ABŞ-İran razılaşmasının həyata keçirilməsinə mane olmaq niyyətində olduğu barədə yayılan məlumatları əsassız adlandırıb.
Qeyd edək ki, daha əvvəl “The Washington Post” ABŞ kəşfiyyatına istinadən Ağ Evin İsrailin Donald Tramp administrasiyasının İranla uzunmüddətli sülh əldə etmək səylərinə mənfi təsir göstərə biləcək addımlar ata biləcəyi barədə məlumatlandırıldığını yazıb.
Xatırladaq ki, Vaşinqton və Tehran arasında yaxın zamanda bütün cəbhələrdə hərbi əməliyyatların dayandırılmasını nəzərdə tutan anlaşma memorandumu imzalanıb. Memorandumun icrası ilə bağlı ABŞ və İran nümayəndə heyətləri arasında İsveçrənin Bürgenstok kurortunda, Pakistan və Qətərin vasitəçiliyi ilə danışıqlar aparılıb. Tərəflər görüşün konstruktiv atmosferdə keçdiyini, müəyyən irəliləyişlərin əldə olunduğunu və əlavə texniki məsləhətləşmələr üçün zəmin yarandığını bildiriblər.
