Yaxın Şərqdə gərginliyin davam etdiyi bir vaxtda Türkiyə ilə İsrail arasında qarşılıqlı sərt bəyanatlar yenidən gündəmin əsas mövzularından birinə çevrilib. İki ölkə liderlərinin son açıqlamaları münasibətlərin gələcək istiqaməti ilə bağlı müxtəlif suallar doğurur.
Mövzu ilə bağlı EDnews-a danışan siyasi şərhçi Azər Həsrət hesab edir ki, mövcud gərginliyə baxmayaraq, Ankara ilə Təl-Əviv arasında hərbi qarşıdurmanın baş verməsi real görünmür.
Onun sözlərinə görə, İsrail hərbi imkanlarına baxmayaraq, Türkiyə kimi regional və qlobal gücə qarşı birbaşa hərbi əməliyyata başlamaq riskini gözə almaz.
Siyasi şərhçi bildirib ki, Türkiyənin Fələstin məsələsində sərgilədiyi qətiyyətli mövqe fonunda bəzi siyasi məqamlar da nəzərə alınmalıdır. O qeyd edib ki, Fələstin rəhbərliyinin “erməni soyqırımı” iddialarına münasibəti də Ankara üçün hər zaman əlavə suallar yaradıb. Azər Həsrətin fikrincə, keçmişdə Qarabağ münaqişəsi dövründə bir sıra müsəlman ölkələrinin Azərbaycana lazımi dəstəyi verməməsi də unudulmamalıdır.
Ekspert hesab edir ki, Türkiyə ilə İsrail arasında münasibətlərin normallaşması təkcə bu iki ölkənin deyil, bütövlükdə Türk dünyasının maraqlarına xidmət edə bilər. Onun sözlərinə görə, Azərbaycanın İsraillə uzun illərdir davam edən əməkdaşlığı bunun uğurlu nümunəsidir və tarixi baxımdan türklərlə yəhudilər arasında ciddi qarşıdurma yaşanmayıb.
Azər Həsrət Azərbaycanın mümkün vasitəçi roluna da diqqət çəkərək bildirib ki, Bakı indiyədək müxtəlif regional məsələlərdə balanslı mövqe nümayiş etdirib və gələcəkdə də dialoqun qurulmasına töhfə verə bilər.
Şərhçi eyni zamanda xəbərdarlıq edib ki, İsraildə qondarma “erməni soyqırımı” iddiaları ilə bağlı mümkün parlament qərarı qəbul olunarsa, bu, təkcə Türkiyə ilə deyil, Azərbaycan və digər türk dövlətləri ilə münasibətlərə də mənfi təsir göstərə bilər.
Azər Həsrətin qənaətinə görə, yaxın perspektivdə Türkiyə ilə İsrail arasında genişmiqyaslı müharibə ehtimalı yüksək deyil. Bununla belə, qarşılıqlı siyasi ittihamlar və diplomatik gərginliyin bir müddət də davam edəcəyi istisna olunmur.
Qeyd edək ki, Türkiyə Prezidenti Rəcəb Tayyib Ərdoğan İsrail rəhbərliyinin son ittihamlarını qətiyyətlə rədd edib. O bildirib ki, Türkiyə tarixində soyqırımı və müstəmləkəçilik siyasəti olmayıb, əksinə, ölkəsi hər zaman dini və milli mənsubiyyətindən asılı olmayaraq, məzlum xalqların yanında olub.
