Belarus Prezidenti Aleksandr Lukaşenko sənətçiləri siyasi proseslərdən uzaq durmağa və yaradıcılıqlarına diqqət yetirməyə çağırıb.
EDnews "BelTA" xəbər agentliyinə istinadən xəbər verir ki, Lukaşenko bu fikirləri “Vitebskdə Slavyan Bazarı” beynəlxalq incəsənət festivalının açılış mərasimində çıxışı zamanı səsləndirib.
Belarus lideri bildirib ki, bugünkü mürəkkəb dövrdə cəmiyyətin incəsənətə daha çox ehtiyacı var və sənət adamlarının əsas missiyası insanlara sevinc bəxş etməkdir.
“İşinizi görün! Bu lənətə gəlmiş siyasətə qarışmayın. Öz işinizi görün, insanları xoşbəxt edin. Sizin də, bizim də xoşbəxt günlərimiz çox deyil. Buna görə də Vitebskin bu kiçik guşəsində baş verənlər insanlara ümid verir. Bu, bizim həyatımızdır. Bu, bizim gələcəyimizdir”, – deyə Lukaşenko vurğulayıb.
Prezident çıxışında mədəniyyətin insanları birləşdirən əsas dəyərlərdən biri olduğunu qeyd edərək, yaradıcı insanların cəmiyyətə müsbət enerji və ümid aşılamaq missiyasını önə çəkib.
