İnsan hüquqları üzrə Avropa Məhkəməsi Ermənistanın hazırda Azərbaycanda saxlanan və artıq barələrində məhkəmə hərəkətləri həyata keçirilən 11 Ermənistan vətəndaşının dərhal sərbəst buraxılması tələbini rədd etməklə bu işdə qanunun aliliyinə hörmətlə yanaşmaq prinsipini əldə rəhbər tutduğunu bir daha sübut etmiş oldu. Məlum olduğu kimi, Ermənistan artıq ikinci dəfə eyni məsələ ilə bağlı İnsan Hüquqları üzrə Avropa Məhkəməsinə müraciət edir və hər iki dəfə rədd cavabı alır. Növbəti rədd cavabı təbii ki, onları bu işdən əl çəkməyə məcbur edə bilməyəcək. Onlar hər rədd cavabından sonra yeni müraciətlər yazaraq əməllərini davam etdirəcəklər.
Bu məsələdə Azərbaycanın mənafeyini gücləndirəcək bir neçə məqama diqqət yetirmək lazımdır.
- Bildiyimiz kimi, Azərbaycanla Ermənistan arasında Rusiyanın da iştirakı ilə üçtərəfli atəşkəs haqqında bəyanat imzalandıqdan və müharibə bitdikdən sonra Azərbaycan ərazisinə terror hərəkəti törətmək məqsədilə göndərilən ermənilərin həbs olunması və hakim qarşısına çıxarılması ilə əlaqədar çox səs-küy qaldırırdılar. Onlar bütün beynəlxalq təşkilatları və nüfuzlu dövlətləri Azərbaycana bu məsələdə təsir göstərməyə çağırır, bəzən Azərbaycana qarşı bəyanatlar səsləndirməyə nail ola bilirdilər.
Misal olaraq, Fransa Prezidenti Emmanuel Makronun bu barədə canfəşanlığını göstərmək olar. O, digər dövlət rəhbərlərindən fərqli olaraq Azərbaycanın mövqeyini eşitmədən ermənilərin çaldığı havanı hələ də oynamaqda davam edir.
İnsan hüquqları üzrə Avropa Məhkəməsinin haqqında danışdığımız qərarı Makron kimilərin arqumentlərinin əllərindən alınması üçün gözəl vasitədir.
- Erməni təbliğat maşını həmişə olduğu kimi Azərbaycanda məhkəmə qarşısına çıxarılan erməni terrorçularının cinayət əməli törətmədiklərini, onların hərbi əsir kimi saxlandıqlarını bütün dünyaya elan edərək güclü təbliğat aparır. Məhkəmənin ilk iclası zamanı isə həbsdə olanların qatı cinayətkar olduğu artıq sübut olunub. İnsan hüquqları üzrə Avropa Məhkəməsi kimi nüfuzlu beynəlxalq təşkilatın onların tələblərini rədd etməsi erməni iddialarının növbəti dəfə ifşa olunması kimi də qiymətləndirilə bilər.
- Rusiya, Fransa, Amerika Birləşmiş Ştatları kimi ermənipərəst mövqe tutan ölkələr Azərbaycanda saxlanan ermənilərin azad olunması üçün müəyyən təsirlər göstərmək yolunu tutmuşdular. Avropa Məhkəməsinin bu qərarı onların cəhdlərinin də əbəs olduğunu sübut etdi və bundan sonra erməni əsirləri ilə əlaqədar Azərbaycana müraciət etən dövlət və beynəlxalq təşkilatlar tələbdən xahişə keçəcəklər.
- Həbsxanada olan və hakim qarşısına çıxarılan erməni terrorçularını azad etmək istiqamətində edilən təzyiqlərə baxmayaraq, heç bir qüvvənin Azərbaycanı tutduğu ədalətli yoldan döndərmək iqtidarına malik olmadığını bir daha sübut etdi.
Bu, eyni zamanda Azərbaycanda gələcəkdə terror aktı törətmək fikrində olan ermənilər üçün də böyük dərs oldu. Bundan sonra Azərbaycan kənardan ediləcək heç bir təsir və təzyiqə məhəl qoymadan terrorçular üzərində ədalət məhkəməsini davam etdirə və ya bu terrorçulardan öz siyasətini həyata keçirmək istiqamətində istifadə edə biləcək.
İstintaq hərəkətləri zamanı ermənilərin Azərbaycan xalqına qarşı törətdikləri vəhşiliklər bir-bir sübut olunduqca beynəlxalq təşkilatların erməni simasında kimləri müdafiə etdikləri bir daha aydın olacaq.
İstintaqla Lüdvik Mkrtiçyan tərəfindən daha 11 nəfər əsir götürülmüş Azərbaycan vətəndaşının müxtəlif vaxtlarda Xocavənd və Ağdərə rayonları ərazisində, Şuşa həbsxanasında və Ermənistanın İrəvan şəhərində qanunsuz saxlanıldığı yerlərdə döyülərək müxtəlif xarakterli işgəncələrə məruz qaldığı və Müdafiə Nazirliyinin N saylı hərbi hissəsinin hərbi qulluqçusunun avtomat silahdan atəş açılaraq öldürüldüyü müəyyən edilib.
Aparılmış istintaq tədbirləri nəticəsində Lüdvik Mkrtiçyanla birlikdə azərbaycanlılara qarşı amansız rəftar edərək onlara işgəncələr vermiş Ermənistanın vətəndaşı 1967-ci il təvəllüdlü Xosrovyan Alyoşa Aramaisoviçin də cinayətkar əməlləri ifşa olunub.
İstintaqla Alyoşa Xosrovyanın 5 nəfər azərbaycanlıya əsirlikdə olduqları müddətdə işgəncə verməsi, onlarla qəddar və qeyri-insani rəftar etməsi müəyyən edilib.
Amma bu o anlama gəlmir ki, bundan sonra ermənilər Azərbaycana qarşı çirkin əməllər törətməkdən və onların havadarları terrorçu və qaniçənləri müdafiə etməkdən əl çəkəcəklər. Əsla yox. Onlar öz iyrənc əməllərini necə var, eləcə də davam etdirəcəklər.
Sadəcə Azərbaycan xalqı ermənilərə qarşı hərbi sahədə olduğu kimi diplomatik cəbhədə də qalib gəlməyin mümkün olduğuna bir daha əmin oldu. Hörmətli cənab Prezidentimiz İlham Əliyevin bir vəzifə kimi qarşımıza qoyduğu hücum diplomatiyası artıq öz bəhrəsini verməkdədir.
Əlimusa İbrahimov