Rus bloqer Sergey Vasilyev öz dostu ilə Rusiya pasportu ilə Qarabağa heç bir problem olmadan keçə bilib. Bloqerin lentə aldığı kadrlardan bir erməninin maşınında Şuşa şəhərinə qədər gəldiyini, daha sonradan Xankəndinə getdiyini görmək mümkündür. O, rus sülhməramlıların olduğu bütün məntəqələrdən keçdiyini və Xankəndinə qədər gəldiyini deyir.  

Qeyd edək ki, 10 noyabr tarixində Azərbaycan, Rusiya və Ermənistan arasında imzalanan üçtərəfli bəyanatın 6-cı bəndinə əsasən, Azərbaycan Laçın dəhlizi üzrə yalnız hər iki istiqamətdə vətəndaşların, nəqliyyat vasitələrinin və yüklərin hərəkətinə təhlükəsizlik zəmanəti verir. Lakin bu buraxılış Laçın dəhlizindən deyil, rəsmi Bakının məsləhət biləcəyi istiqamətdən olmalıdır. Və Laçın dəhlizi yalnız Qarabağda yaşayan ermənilər üçün müvəqqəti olaraq Azərbaycanın verdiyi humanitar koridor rolunu oynayır.

Bu, Rus sülhməramlıların xarici ölkə vətəndaşını Qarabağa buraxması ilə bağlı yaşanan ilk belə hal deyil. Həmçinin, Rusiya pasportu ilə bölgəyə edilən səfərlər təhlükəli xarakter daşıyır.

Məsələ ilə bağlı siyasi şərhçi Teymur Qasımlı Eurasia Diary-yə açıqlama verib.

“Xatırlayırsınızsa, 10 Noyabr bəyanatından sonra rus sülhməramlıların Qarabağa rusları gətirməsilə bağlı məlumatlar yayılmışdı. Hətta orada kilsələrin açılışı ilə bağlı tədbir də keçirmişdilər. Daha bir məlumat isə Rusiya Federasiyasının Qarabağdakı ermələrə və ümumiyyətlə orada yaşayanlara rus pasportu verməyə başlaması ilə bağlı idi. Həmin vaxt Azərbaycan cəmiyyətində buna qarşı haqlı olaraq etirazlar oldu. Amma bu məlumat nə təsdiq, nə də təkzib olundu. Bilinir ki, bu passport verilir və belə videolar kifayət qədər çoxdur”.

Teymur Qasımlı bildirib ki, Azərbaycan tərəfi konkret olaraq Laçın dəhlizində rus sülməramlıların olmasına ona görə razılaşıb ki, bura nəzarət etsinlər və gediş-gəlişə imkan verməsinlər: "Qarabağa rus pasportu ilə edilən səfərlər və Rusiya sülhməramlıların buna göz yumması 10 Noyabr bəyanatının kobudcasına pozulması deməkdir. Azərbaycan hökuməti 10 Noyabr bəyanatına da istinad edərək buna qarşı hər hansı tədbirlər görə, rus pasportu ilə səfərlərin dayandırılmasını tələb edə bilər. Yəni, beynəlxalq hüququn maddələrinə istinad edərək rus sülhməramlıları və Rusiya dövləti ilə bağlı istək və tələblərini bildirə bilər. Laçın dəhlizi ilə bağlı məsələni gündəmə gətirə bilər ki, siz burada özbaşınalıq edirsiz, Azərbaycan Respublikası ərazisinə rus pasportu ilə daxil olunmasına icazə verirsiz. Ya buranın qorunmasını təşkil edin, ya da Azərbaycan Laçın dəhlizi və sülhməramlıların orada göstərdiyi məsuliyyətsizliklərlə bağlı hər hansı tədbir görəcək. Azərbaycan Xarici İşlər Nazirliyi bəyanatla rus sülhməramlıların ağ missiyasını düzgün yerinə yetirməməsinə qarşı cavab verilməlidir".

Gülnar Səlimova

Məqalə Azərbaycan Respublikası Medianın İnkişafı Agentliyinin maliyyə dəstəyi ilə hazırlanmışdır