Avropa Siyasətinin Təhlilinin Mərkəzi Ermənistan-Azərbaycan və Türkiyə-Ermənistan əlaqələri ilə bağlı məqalə yayımlayıb.

Məqalədə Ermənistanın Türkiyə ilə əlaqələrinin normallaşdırmasının mümkünlüyü və regionda bütün tərəflərin maraqlarına uyğun olan yeni status-kvonun formalaşdırılması üzrə Ermənistan və Azərbaycan arasında “səssiz” müqavilənin imzalanması ehtimalından danışılır.

Məqalədə önəmli məqama toxunulur: “Əgər Ermənistan Türkiyə ilə münasibətlərini yaxşılaşdırsa, hərbi qarşıdurma ehtimalı yoxa çıxacaq və bütün tərəflər üçün uyğun olan status-kvonun formalaşması üzrə Ermənistanla Azərbaycan arasında “səssiz” müqavilə bağlanacaq”.

Maraqlıdır, məqalədə “səssiz” müqavilə yazılmaqla nə nəzərdə tutulur? Niyə hər iki tərəf arasında müqavilə gizli şəkildə imzalanmalıdır? Azərbaycan və Ermənistan “səssiz” müqavilə imzalamağa cəhd edə bilərlərmi?

Məsələ ilə bağlı EDNews.net- ə açıqlama verən politoloq İlqar Vəlizadə hesab edib ki, Ermənistan və Azərbaycan arasında xırda və o qədər də əhəmiyyəti olmayan məsələlər üzrə “səssiz” müqavilələr imzalana bilər.

“Hər iki dövlətin rəsmiləri belə müqavilələr ətrafında danışıqlar apara bilər. Lakin prinsipial və konseptual məsələlərə aid heç bir halda gizli müqavilə imzalana bilməz. Çünki Azərbaycan rəhbərliyi Ermənistanla problemlərin beynəlxalq hüququn prinsipləri və normaları çərçivəsində həll olunmasının tərəfdarıdır. Ölkəmiz Ermənistanla beynəlxalq hüquqa əsaslanan müqavilələrin və sazişlərin imzalanmasına çalışır. Bura hər iki dövlət arasında sərhədlərin delimitasiyası və demarkasiyası, eləcədə regional kommunikasiyaların açılması daxildir”.

Politoloq qeyd edib ki, Ermənistan və Azərbaycan arasında müqavilələrin və sazişlərin imzalanmasının təmin edilməsi üçün xüsusi fondun yaradılmasına zərurət  ola bilər. Belə olan təqdirdə hər iki dövlətin rəsmiləri o qədər də əhəmiyyəti olmayan səssiz şəkildə müqavilə imzalaya bilər.

“Bakı və Yerevan arasında dövlət səviyyəsində müqavilələrin imzalanmasının təmin edilməsi üçün xüsusi siyasi və ictimai fond lazımdır. Bu məsələ ətrafında hər iki dövlətin rəsmiləri qısa danışıqlar və görüşlər apara bilər. Bu fondların təşkil edilməsi üçün dırnaq arası səssiz müqavilənin imzalanması mümkündür. Ancaq dediyim kimi konseptual məsələlərdə bu mümkün deyil. Yalnız xırda məsələlərdə mümkündür”.

Yunis Abdullayev