“Ermənistan hakimiyyəti Azərbaycanla sərhəddə xarici qüvvələri cəlb etmək istəyir”. Bu sözləri EDNews.net-ə sabiq Xarici İşlər naziri, politoloq Tofiq Zülfüqarov Ermənistanla sərhədin Kəlbəcər və Laçın istiqamətində erməni hərbi birləşmələrinin Azərbaycan mövqelərinə qarşı təxribatlarını şərh edərkən bildirib.

Qeyd edək ki, noyabrın 16-da Ermənistan hərbi birləşmələri Laçın və Kəlbəcər istiqamətində mövqe tutan Azərbaycan ordusuna qarşı provokasiyalara əl atıb. Lakin Azərbaycan Silahlı Qüvvələri düşmənin niyyətini başa düşüb və çevik tərpənərək onun hücumlarının qarşısını alıb. Müdafiə Nazirliyinin məlumatına görə, cavab zərbələri nəticəsində düşmənin xeyli sayda canlı qüvvəsi və texnikası məhv edilib. Bununla bərabər, Azərbaycan hərbiçiləri Ermənistan tərəfinin iki postunu nəzarət altına alıb və 13 erməni hərbçisini əsir götürüb.

Rusiya Müdafiə naziri Serqey Şoyqonun vəziyyət ilə əlaqədar Ermənistan və Azərbaycan müdafiə nazirləri ilə telefon danışığından sonra sərhəddə atəşkəs elan edilib. Hal-hazırda regionda vəziyyət stabil olaraq qalır.

Digər vacib məqam isə iki dövlətin sərhədində hərbi qarşıdurma baş verərkən Ermənistan Təhlükəsizlik Şurasının katibi Armen Qriqoryanın bəyanatıdır. Qriqoryan Şuranın iclasında Ermənistanın Azərbaycan ilə sərhədlərin delimitasiya və demarkasiya olunmasına hazır olduğunu qeyd edib.

Ortaya maraqlı sual çıxır: Azərbaycan regional problemlərin həlli zamanı hansısa irəliləyişə nail olmaq üçün daima gücdən istifadə etməlidir? Ümumiyyətlə, Yerevanın hərbi qarşıdurmalardan dərs alaraq yaxın perspektivdə bir sıra regional məsələlərin həlli ilə bağlı danışıqlara qayıtması nə dərəcədə həqiqəti əks etdirə bilər?

Məsələyə toxunan politoloq Tofiq Zülfüqarov hesab edir ki, Ermənistan hakimiyyəti hal-hazırda Azərbaycanla sərhəddə təmas xətti formalaşmasına çalışır.

“Sərhəddə baş verən təxribatlar onu göstərir ki, Ermənistan delimitasiya və demarkasiya danışıqlarına getməkdən boyun qaçırır. Yerevan qəti şəkildə Azərbaycanla qanuni sərhədin rəsmiləşməsini istəmir. Əvəzində isə sərhəddə təmas xəttinin yaranmasına cəhd edir. Eyni zamanda, təmas xəttinin formalaşdırılması üçün bölgəyə hər hansı xarici qüvvələri cəlb etmək istəyir”, – deyə Züflüqarov bildirib.

Politoloqun fikrinə görə, Ermənistan bu cür siyasət yeritməklə özünü sığortalamaq istəyir. O, əlavə edib ki, Azərbaycan belə bir siyasətin qarşısının alınması üçün ciddi tədbirlər görməyə başlayıb.

“Ermənistan özünü sığortalamaq üçün regionun sabitliyinə və əmin-amanlığına qarşı bu cür siyasət yeridir. Bu siyasəti davam etmək qərarındadır. Azərbaycan da Yerevanın siyasətini anlayır və bunun qarşısının alınması ilə əlaqədar ciddi tədbirlər görmək üçün bir sıra imkanlarından istifadə edir”,  – deyə politoloq bildirib.

“Ermənistan rəhbərliyi ölkəsinin sığortalamasında xarici qüvvələrə etibar edir. Çalışırlar ki, onları xarici qüvvələr qorusun”, – deyə o əlavə edib.

Armen Qriqoryanın demarkasiya açıqlamasına münasibət bildirən Tofiq Zülfüqarov Ermənistanın Azərbaycanın ərazi bütövlüyünün və suverenliyinin tanınmasının vacibliyini qeyd edib.

“Hesab edirəm ki, delimitasiya və demarkasiya məsələsi texniki bir məsələdir. Ermənistan hakimiyyəti bu məsələ ilə bağlı danışıqlara qatılmamışdan qabaq Azərbaycanın ərazi bütövlüyünü, suverenliyini və qanuni sərhədlərini tanıması ilə bağlı bəyanat verməlidir. Yerevan regionda sabitlik istəyirsə ilk öncə bu addımı atmalıdır”.

Yunis Abdullayev

Məqalə Azərbaycan Respublikası Medianın İnkişafı Agentliyinin maliyyə dəstəyi ilə hazırlanmışdır

6.3.4. ictimai və dövlət maraqlarının müdafiəsi;