Xəbər verdiyimiz kimi, İran prezidenti İbrahim Rəisi və xarici işlər naziri Hüseyn Əmir-Abdollahian ölkənin Şərqi Azərbaycan əyalətində helikopterin qəzaya uğraması nəticəsində həlak olublar. Artıq hadisənin üzərindən 2 gün keçib, lakin hələ də rəsmi açıqlama yoxdur. Bəs qəzanın baş verməsinə səbəb nə olub?

Ednews xəbər verir ki, Rusiyanın veteran helikopter sınaq pilotu Vadim Bazikin "Sputnik"ə müsahibəsində bildirib ki, helikopterlər bütün hava şəraitinə uyğun nəqliyyat vasitələridir, lakin Rəisinin kopterində səbəb birbaşa pilotla əlaqəli ola bilər:

"Helikopterin ən zəif nöqtəsi, təəssüf ki, ekipajdır, çünki pis havada uçuş edə bilən çox az sayda pilot var. Əgər bir pilot pis hava şəraitində uçuş edəcəyini görürsə, o, şəxs helikopterlə əlaqəli bütün məlumatları dərindən bilməlidir. Dağlıq ərazinin özünəməxsus xüsusiyyətləri var. Kələ - kötürlü, alçaq və ya hündür hissələri mövcuddur. Dağlarda uçuş etmiş təcrübəli pilot bütün bunları bilir və ya bilməlidir. Ona görə də hər şeyi qabaqcadan o, təxmin etməlidir".

Bazikin deyib ki, o, vaxtilə Rusiyanın yüksək rütbəli məmurlarının daşınması ilə məşğul olduğu zaman, pis hava şəraitində uçuşlar zamanı “yox deməyi bilən” yetkin pilotları seçib.

“Pilotlar aktyorlar kimidirlər və özlərini çox bilmiş hesab edirlər və fikirləşirlər ki, məndən əvvəl iki vertolyot təhlükəsiz uçubsa, mən də uça bilərəm. Lakin gördük ki, elə olmadı. Əksinə Rəisini müşayiət edən helikopterlər sağ çıxdı, prezidentin isə yox.

ABŞ istehsalı olan Bell-212 helikopteri nisbətən köhnə olsa da etibarlı bir texnikadır. Hərçənd prezident helikopteri olduğu üçün onun təhlükəsizliyinə ayrıca diqqət yetirilib. Ona görə burada yeganə səbəb olaraq pilotun təcrübəsizliyi göstərilə bilər" - deyə o, fikrini yekunlaşdırıb.

Əkbər Novruz