Martın 2-də Bakı Kitab Mərkəzində Hamlet İsaxanlının "Mənim Qarabağım və ya Qarabağ düyünü" kitabının təqdimat mərasimi keçirilib.
Ednews tədbirdən qısa reportaj yazısını təqdim edir:
Yolum Bakı Kitab Mərkəzinədir. Səbəbkar isə fizika-riyaziyyat elmləri doktoru, professor, Xəzər Universitetinin və Dünya məktəbinin təsisçisi Hamlet İsaxanlının "Mənim Qarabağım və ya Qarabağ düyünü" kitabının təqdimatıdır.
Kitab Mərkəzində tanınmış simalar gözümə dəyir. Yazıçılar, Xalq artistləri, millət vəkilləri, incəsənət nümayəndələri. Oxucular, media nümayəndələri də tədbirin başlanmasını gözləyirlər. Elə bu dəm Xalq yazıçısı Anarın əlində Hamlet müəllimin təzə kitabını vərəqlədiyini görürəm.
Xalq yazıçısı kitabın əhəmiyyətindən söz açır. Eyni zamanda Qarabağa bağlı bir çox kitablar dərc olunduğunu da dedi:
“Kitabda Qarabağla bağlı müxtəlif baxışlar var. O cümlədən, Qarabağdan çıxan maarifçilər haqqında məlumatlar və şəkilləri də görmək olar. Elə ancaq Qori seminariyası məzunlarını götürsək, bir kitabın özüdür. Həmin maarifçilərin yolunu davam etdirənlərdən biri Hamlet İsaxanlıdır. Xəzər Universitetin yaranması dediklərimin təsdiqidir. Həmçinin, Hamlet İsaxanlı çox gözəl şair və tərcüməçidir”.
Xalq yazıçısı öz təbriklərini bildirib. Sonda isə Azərbaycan Yazıçılar Birliyi adından Fəxri diplomu Hamlet İsaxanlıya təqdim etdi.
AMEA-nın prezidenti akademik İsa Həbibbəyli kitabda olan maraqlı nüansları diqqətə çatdırıb.
O, vurğulayıb ki, kitaba akademik tərəfdən baxıldıqda yeni araşdırma materiallarının olduğu görə bilərik:
“"Mənim Qarabağım və ya Qarabağ düyünü" kitabında yeni araşdırma materialları mövcuddur: Qarabağ bizim ən şərəfli, məsuliyyətli mövzumuzdur. Azərbaycanlı olmayan müəlliflərin əsərlərində həm də ümumiyyətlə Qarabağın tarixinə aid olan mənbələrdən gətirdiyiniz sitatlar, faktlar ilk dəfə Azərbaycan Qarabağnaməsinin dövriyyəsinə daxil olur. Bu mövzudan yazan bir çox müəlliflərin bir çoxu birtərəfli mövqedən çıxış edir. Siz isə tərəfsiz çıxış edirsiniz. Hesab edirəm ki, bu kitab təkcə elmi-puplistikik əsər deyil, həm də müstəqillik dövrü Azərbaycan ədəbiyyatında sənədəli bədii nəsrin mükəmməl nümunəsidir. Kitabda təkcə Qarabağ haqqında yox, ümumi Azərbaycan haqqında da geniş məlumatlar var. Azərbaycanın çoxlu problemlərini bu kitabda asanlıqla görmək olar. Bu kitab bütün məntiqi, ruhu, imkanları və iddiaları ilə müstəqil Azərbaycan haqqında Hamlet İsaxanlının manifestidir”,-deyə akademik qeyd edib.
İsa Həbibbəyli akademiya və öz adından şairi təbrik edib. Daha sonra isə akademiyanın Fəxri fərmanı ilə təltif edib.
Mətbuat şurasının sədri Rəşad Məcid kitabdakı materialların zaman-zaman "525-ci" qəzetdə hissə -hissə çap olunduğunu diqqətə çatdırıb.
“Hamlet İsaxanlı bu kitabda Azərbaycan və Erməni yazıçılardan sitatlar gətirib. Bu da onu göstərir ki, azərbaycanlı yazıçılar erməni xalqının əleyhinə heç nə yazmayıblar. Əsərin son hissələrində birgə yaşayış arzuları ifadə olunur. Biz iki il qabaq hiss edirdik ki, bunun hələ vaxtı yetişməyib. İndi isə fərqli düşünürük”.
Kitabda Qarabağa dərin sevginin olduğunu bildirən Rəşad Məcid təəssüflə qeyd edib ki, Hamlet İsaxanlı hələ də Şuşaya səfər etməyib.
Millət vəkili Tural Gəncəliyev kitabla bağlı fikirlərini bölüşüb.
O qeyd edib ki, Qarabağa aid yazılan hər bir kitab qürurludur. Ölkənin, xalqın gücünü göstərir.
“Ümid edirəm ki, bu kimi təqdimatlar Şuşa, Xocalı, Xankəndi və Ağdərədə olar. Qarabağın digər gözəl yerlərində keçirərik”.
Jurnalist, yazıçı Azər Qismət (Məmmədov) kitabın dəyərindən danışıb.
O, bu kitabı oxuyanda elə bil ki, kinoya baxdığını bildirib.
“Kitabda incəliklər çoxdur. Maraqlı faktlar da var. Məsələn, qeyd etmisiniz ki, Ermənistanı dağlarında dincəlirdim. Eyni zamanda Azərbaycan toponimlərinin adınıda çəkmisiniz. Həmin yerlər Zəngəzur və Göyçədir. Kitab neytral yazılıb”.
Gecəyə xanəndələr Alim Qasımov, Fərqanə Qasımova, Nəzakət Teymurovanın ifası xüsusi rəng qatıb.
Aysel Şahmar
