Xəbər verdiyimiz kimi, Milli Məclisin deputatı Fazil Mustafa parlamentdə “Azərbaycan Respublikasının 2024-cü il dövlət büdcəsi haqqında” qanun layihəsinin müzakirəsində çıxışı zamanı bildirib ki, kino sahəsində, xüsusilə də kommersiya filmləri üçün əlavə dəyər vergisi ləğv edilməlidir. Çünki büdcəsən ayrılan vəsait kino sahəsi üçün elə də çox deyil.

Millət vəkilinin təklifinə münasibət bildirən Azərbaycan Kinematoqrafçılar İttifaqının katibi, rejissor Əli İsa Cabbarov Ednews-a açıqlamasında qeyd etdi ki, təklifi Kino İttifaq da dəstəkləyir:

“Fazil müəllimin kinoda vergi güzəştləri ilə bağlı fikirləri təqdirəlayiqdir. Ümumiyyətlə, bir təşəbbüs olaraq bu fikri dəstəkləyirəm. Kino İttifaq da bu təşəbbüsü dəstəkləyir. Amma bunula yanaşı bildirmək  istəyirəm ki, kino sahəsində fəaliyyət göstərən şirkətlər arasında ƏDV ödəyiciləri çox azdır. Ona görə vergi güzəştləri arzu ediləndir ki, təkcə ƏDV-dən azad olmaları yox, daha çox yaxşı olar ki, kinoya investisiya yatırımlarına stimul verən vergi güzəştləri olsun. Yəni kinoya investisiya yatıran iş adamı kino istehsalını dəstəkləyirsə ƏDV ödəyicisi olub olmamağından asılı olmayaraq vergilərdən müəyyən güzəştlər olsun. Əsas budur. Kino istehsalı ilə məşğul olan şirkətlərin çoxu az büdcəli flmlər istehsal edir. Yaxud da onların hamsını tam rəsmiləşdirmir. Buna baxmayaraq Fazil müəllimin fikirləri ilk addım üçün müsbət təşəbbüsdür”. 

Oğuz