Rusiya-Ukrayna müharibəsinin hələ də davam etməsi və Yaxın Şərqdəki vəziyyətin günü-gündən gərginləşməsi neft qiymətlərinin kəskin şəkildə bahalaşacağını göstərir. Bu barədə Dünya Bankı neftin bir barrelinin 150 dollara yaxınlaşacağını bildirib. Müharibələrin davam etməsi nəticəsində dünyada enerji və ərzaq qiymətləri kəskin dərəcədə bahalaşıb. Bu halda neftin qiymətinin də bahalaşacağı gözlənilən haldır.
Məsələ ilə bağlı Ednews-a danışan Neft Araşdırmaları Mərkəzinin Rəhbəri İlham Şaban dövlətlərin artıq müharibə iqtisadiyyatına tab gəticək dərəcədə öyrəşdiyini bildirib.
“Bu gün belə bir siyasi vəziyyətdə dəqiq proqnoz vermək çətin olsa da, Dünya Bankının yaydığı məlumat özündə böyük ehtimal təşkil edir. Bu proqnoz ona əsaslanırdı ki, əslində Qəzzada baş verən münaqişədə İsrailin əsas məqsədi İran obyektlərini vurmaq istəyi və buna cavab olaraq da, İranın Hörmüz boğazında naviqasiyanı dayandırması idi. Beləliklə, İran Qərbə yönələn tankerlərin regiondan çıxışının qarşısını almış olardı. Bu ssenaridə neftin bir barrelinin qiymətinin nəinki 150, hətta 200 dollara yüksəlməsindən də söhbət gedirdi. Yaxın Şərqdəki münaqişənin indiyədək davam etməsi və Həmasın real şəkildə müqavimət göstərə bilməməsi, İsrailin vəziyyəti öz təsiri altına ala bilməsinə gətirib çıxardı. İran bu siyasi münaqişədən özünü sovuşdura bildi və onun coğrafi areası genişlənmədi. Bununla da, bazarda neftin qiyməti 10 dollara yaxın artdı. Bu neftin qiymətinin daha da artması riskini xeyli azaltdı. Bu gün neftin bir barrelinin qiyməti 81 dollardırsa, münaqişənin ilk vaxtlarında neftin qiyməti 90 dolları keçmişdi. Rusiya-Ukrayna müharibəsində də bəzi iqtisadi faktorlar var ki, müharibənin ilk aylarında bütün dünyaya mənfi təsir edib. Lakin, münaqişə davam etdikcə müharibə iqtisadiyyatına keçid edən tərəflər vəziyyətin stabilləşdirə bildilər. Dünya bazarında biz bu gün onu görürük ki, iqtisadi zəncirin qırılmış halqaları artıq yenidən öz yerini alır və əvvəlki vəziyyətinə qayıdır. 2022-ci ildə baş vermiş xaotik iqtisadi vəziyyətə dövlətlər artıq 2023-cü ildə öyrəşib. Bu iqtisadiyyatda baş verən hər bir geriləmədən sonra nəzərə çarpan cilovlanmış və xüsusi diqqət ayrılmış stabilləşmə hadisəsidir. Təbii ki, neftin qiyməti ola bilər ki, yenidən yüksəlsin və 90 dolları da keçsin. Lakin, bu tamamilə siyasi hadisələrin gedişatından asılıdır. Ümumən orta qiymətdən bəhs etdikdə, əgər neftin bir barrelinin qiyməti 103 dollar olmuşdusa, cari il üçün bu 85 dollar, gələn il üçün isə təqribi 80-81 dollar hesablanıb”.
