Azərbaycanın yük daşınması şirkətləri artıq Çindən Azərbaycana məhsulları 6 gün ərzində çatdırmağı bacarıb. Buna nail olmaq sözsüz ki, Azərbaycanın quru yollarla həyata keçirilən xarici ticarətini möhkəmləndirəcək.
Bundan başqa bu nailiyyətin ölkə üçün hansı müsbət cəhətləri olacaq?
“Çindən Azərbaycana məhsullarınin 6 gün ərzində çatdırılması yeni bir uğurdur. Hər iki ölkə üçün illərdir davam edən iqtisadi, siyasi ticari və mədəni əlaqələrin genişləndirilməsində bu xidmət öz tövhəsini verəcəkdir. Azərbaycan Yerüstü Nəqliyyat Agentliyinin bu sahədə xüsusi xidmətləri danılmazdır.”
Bu fikirləri Ednews-a açıqlamasında bildirən iqtisadi ekspert Günay Hüseynova bu layihənin yerli sahibkarlara kömək edəcəyini bildirib:
“Daha öncə belə bir xidmət yox idi ki, birbaşa Çindən quru sərhədlərlə məhsul ölkəmizə çatdırılsın. Rusiya, Qazaxıstanın yük daşıma şirkətləri vasitəsi ilə dolayı yolla Azərbaycan bazarına daxil olurdu. İndi isə, artıq birbaşa ölkəmizə daxil olur bu da təbii ki, Azərbaycan iqtisadiyyatı xüsusi ilə xarici ticarəti üçün faydalıdır. Yalnız burada bir məqamı qeyd etmək istərdim ki, bu proses yerli sahibkarları qorumalı və onların xarici bazara çıxışına şərait yaratmalıdır.”
Sürətli quru yolunun yaradılması bazarda qiymətlərə necə təsir edəcək?
“Bəzi istehsalçı ölkələrdə yüksək texnologiyanın inkişafı, bəzilərində ucuz işçi qüvvəsi məhsulun maya dəyərinin ucuz başa gəlməsinə və satışa birbaşa təsir edir. Çin bazarı da bu bazarlardandır. Lakin, bir məqam var ki, əhalinin büdcəsi üçün münasib ola bilər. Buna baxmayaraq, xarici valyutanın ölkədən çıxışı və yerli sahibkarların yox olması məsələsini nəzərə almaq lazımdır.
Bu, ticarət saldosuna təbii ki, təsir edir. Sadəcə olaraq neftdən gələn vəsaitlərin hesabına biz bunu hiss etmirik. Azərbaycan məhsullarının həmin ölkənin bazarına çıxması və hər hansı bir məhsulun “Made in Azerbaijan" adı altında tanınması daha məqsədəuyğun olardı.
Beləliklə, iqtisadi baxımdan saldo tarazlanardı. Düşünürəm ki, biz təkcə idxal yox, həm də ixrac etməliyik. Hazırda məqsədimiz xarici ölkələri zəngin edib valyuta axını ilə ölkəni idxaldan asılı vəziyyətə düşməsinin qarşısını almaqdır.”
Fərid Axund
