Azərbaycanın Qarabağın erməni sakinlərinin ehtiyaclarının qarşılanması üçün təklif etdiyi Ağdam-Xankəndi yolundan istifadə olunmaqla yardım göstərmək təklifi artıq reallığa çevrilib.
Bu, isə Azərbaycanın siyasi arenada növbəti qələbəsidir. Çünki Qarabağa qida və digər zəruri mallar məhz bölgənin tamhüquqlu və suveren sahibi - Azərbaycanın ərazisindən keçməklə göndəriləcək. Azərbaycan bütün təzyiqlərə rəğmən sülhü bərpa edir. II Qarabağ müharibəsində artıq 3 il keçir.
Azərbaycan 3 il ərzində həm Qarabağla, bağlı həm də beynəlxalq arenada yürütdüyü siyasət necə nəticə verib, növbəti dayanacaq Xankəndi ola bilərmi?
Məsələ ilə Ednews-a danışan hərbi siyasi ekspert Heydər Mirzə 3 il ərzində Azərbaycan diplomatiyası tərəfindən atılan addımlar öz bəhrəsini verdiyini bildirib.
“Azərbaycanın dövlət suverenliyi beynəlxalq hüquq tərəfindən de-jure olaraq tanınır, lakin Qarabağ ərazisində hazırda de-fakto hərbi birləşmələr var və yavaş yavaş onlar da dəf edilir.
Əsas istiqamət ermənilərin yaşadığı yerdə de-fakto olaraq nəzarəti gücləndirməkdir.
Nəzarəti bərqərar etmək o qədər asan olmur. Xankəndidə yaşayan erməniləri Ermənistana birləşdirən Laçın dəhlizi onların lehinə Ermənistanın Qərb tərəfdaşları tərəfindən dəstəklənir. Əsas məsələ Laçın dəhlizinin eksteritorial ərazi olmasıdır.
Yəni Ermənistan Qarabağda Ağdam-Xankəndi yolu bərpa olunursa, Azərbaycan ərazisində güc balansını öz tərəfinə çəkmək üçün Laçın dəhlizi üzərində nəzarəti paralel aparmaq istəyir”.
Hərbi ekspert bildirir ki, 44 günlük müharibədən sonra sözsüz ki, üstünlük Azərbaycandadır.
“Laçın dəhlizində Azərbaycan nəzarətini zəiflədərək güc mərkəzi yaratmaq boş bir strategiyadır.
Regional güclər Azərbaycanın suverenliyini tanıyır, bu istər 3 il ərzində istərsə də müharibədən əvvəl yürütdüyümüz siyasətin nəticəsidir”.
O, son olaraq bildirib ki, əlbəttə bizim məqsədimiz Xankəndində Azərbaycan bayrağını dalğalandırmaqdır. Lakin əsas məsələ Ermənistan və tərəfdaşlarının planı olan Laçın dəhlizində Azərbaycan nəzarət mexanizmini gücləndirmək və Ağdam Xankəndi yolunu açmaq idi.
Xəyal Ramiz
