Azərbaycan Ermənistan ilə sülhün astanasındadır. Sərhədlərin müəyyənləşdirilməsindən və gözlənilən sülhün baş tutmasından və sonra iki ölkə arasında iqtisadi və siyasi münasibətlərin qurulması gözlənilir? İki ölkə illərdir olan soyuq münasibətləri yumşalda biləcəkmi? Sülh istəyənlər sülhü təmin etdikdən sonra onu qoruya biləcəkmi?
Mövzü ilə bağlı politoloq Zərdüşt Əlizadə Ednews-a açıqlamasında bildirib ki, sülh olduqda iki ölkə arasında qarşılıqlı etibar və etimad ola bilər:
“Delimitasiya və demarkasiya prosesi bir anda baş verəcək bir məsələ deyil.
Bəzən bu 10 illər ərzində həll yolunu tapır. Çünki Azərbaycan Ermənistan arasında sərhədin uzunluğu min kilometrə yaxındır.
Müzakirələr və tənzimləmələrdən sonra sərhədlər müəyyən olunacaq. Yəni bu uzun prosesdir.
Əsas odur ki, tərəflər həqiqətəndə sülh istəsinlər və münaqişədən faydalanmaq istəyən qüvvələri bu prosesdən kənarda tutsunlar.
Bu halda iki ölkədə sülhün əsas parametrlərini müəyyənləşdirə bilərlər. Daha sonra uzunmüddətli sülh prosesi başlaya bilər. Xüsusilə də sərhədlər açıqdıqdan sonra iqtisadi əlaqələr bərpa ola bilər. Qarşılıqlı etimad və etibar sürətlə genişlənəcək və ölkələr vahid region çərçivəsindən ümumi problemlərə birgə həll yolu tapacaqlar.
Nəticədə olaraq ermənilər də anlayacaq ki, yaxşı yaşamaq, ölməmək sülh içində olmaq ən yaxşı alternativdir”.
Politoloq hesab edir ki, iki ölkə arasında münaqişənin başlamasında Rusiyanın böyük rolu olub.
“1988-ci ildən rəsmi Kremlin hakimiyyətinin bu proseslərlə bağlı qızışdırıcı rolu böyükdür.
Lakin Moskvanın təsiri hazırda zəifdir. Bundan başqa biz həmçinin ABŞ və Avropa ölkələrinin bizim daxili işlərimizə qarışmasına icazə verməməliyik.
Belə olduğu halda biz diplomatik münasibətləri bərpa edərək qarşılıqlı mənafe çərçivəsində birgə inkişafı təmin edək.
Xalqların bir birinə uyğunlaşması məsələsinə gəldikdə isə bu çətin məsələ deyil. Sadəcə olaraq xalqları müəyyən vasitələrlə nifrətə və anti-tolerantlığa sövq etməsələr hər şey normal olacaq. Necə ki, sovet dövründə olduğu kimi”.
Xəyal Ramiz
