“Azərbaycan Prezidenti İlham Əliyev və Ermənistanın baş naziri Nikol Paşinyan tezliklə sülh razılaşmasına nail olmaq əzmində olduqlarını bəyan ediblər. Mən 21 il Minsk Qrupunun amerikalı həmsədri olmuşam.
Bu zaman ərzində vasitəçilik etsəm də, bu münaqişənin hansısa yolla həllini axtarsam da, heç vaxt sülh sazişinin mümkünlüyünə inanmamışam”.
Bu fikirləri Ednews-a açıqlaması zamanı ABŞ-ın Azərbaycandakı keçmiş səfiri Metyu Brayza səsləndirib.
Onun sözlərinə görə Ermənistan və Azərbaycan arasında əsirlərin mübadiləsi və ümumən münasibətlərin yaxşılaşdırılmasına dair əldə olunan razılaşma Qarabağ münaqişəsi və onun həlli tarixində mühüm dönüş nöqtəsidir.
“Bizim missiyamız danışıqların uzun illər çəkəcəyini gözlədiyimiz gələcək sülh sazişi üçün çərçivə hazırlamağa çalışmaq idi. İndi ilk dəfə deyə bilərəm ki, sülh sazişi ehtimal deyil realdır.
Bundan əlavə, Bakı ilə İrəvan arasında bu ikitərəfli razılaşma və bəyanatda iki ölkə arasında vasitəçiyə ehtiyac olmadığı, Azərbaycan və Ermənistan liderlərinin təkbaşına uğurlu danışıqlar apara biləcəyi vurğulanır. Bu, çox mühüm inkişafdır”.
Eks-səfir vurğulayıb ki, münasibətlərin yaxşılaşdırılması üçün atılacaq digər addımlar da təbii ki, sülh sazişinin bağlanması ilə sonlanacaq:
“Bundan sonra Azərbaycanın əsas hissəsini Ermənistan üzərindən Naxçıvana birləşdirəcək son 42 km-lik xəttin tamamlanması, yəni Ermənistanın regional iqtisadiyyata reinteqrasiyası deməkdir.
Həmçinin Ermənistan da daxil olmaqla fiber optik birgə investisiyalarda əməkdaşlıq olacaq. İstər sənaye sərmayələri olsun, istər geniş infrastrukturlarda böyük investisiyalar. Bütün bunların yolu sülh müqaviləsi ilə açılacaq. Beləliklə, biz tarixi dönüş nöqtəsindəyik.
Ümid edirəm ki, bu proses davam edəcək. Son bir məqamı da vurğulamaq istərdim ki, Ermənistanın təxminən 50 min əsgərinin Azərbaycan ərazisindən çıxarılması və Qarabağda Azərbaycan ərazisi üzərində separatçı siyasi hakimiyyətin sona çatması ilə Baş nazir Paşinyanın və Prezident Əliyevin arzuladığı sülh sazişinə son maneə aradan qaldırılıb”.
Xəyal Ramiz
