Xəbər verdiyimiz kimi, Müdafiə Nazirliyi sentybarın 19-da Azərbaycanın Qarabağ bölgəsindəki qanunsuz erməni hərbi birləşmələrinə qarşı antiterror tədbirlərinə başlandığını elan edib.
Tədbirlərin məqsədi Qarabağ iqtisadi rayonunda törədilən genişmiqyaslı təxribatların qarşısının alınması, Ermənistan silahlı qüvvələrinin birləşmələrinin tərksilah edilərək ərazilərimizdən çıxarılması, onların hərbi infrastrukturunun zərərsizləşdirilməsi, işğaldan azad edilmiş ərazilərə qayıdan dinc əhali, habelə bərpa-quruculuq işlərinə cəlb olunmuş mülki işçilər və hərbi qulluqçularımızın təhlükəsizliyinin təmin olunması və Azərbaycan Respublikasının konstitusiya quruluşunun bərpa edilməsidir.
Müdafiə Nazirliyi bəyan edib ki, bu tədbirlər yalnız hərbi hədəflərə yönəlib.
“Bir daha bildiririk ki, mülki əhali və infrastruktur obyektləri hədəfə alınmır, yalnız legitim hərbi hədəflər sıradan çıxarılır”, - Nazirlik bildirib.
Ednews xəbər verir ki, Azərbaycandakı müxalifət qüvvələrinin liderləri də Ordumuzun antiterror tədbirlərinə başlamağını dəstəkləyiblər.
Müasir Müsavat partiyasının sədri Hafiz Hacıyev:
“Azərbaycan Ermənistana bu məsələdə çox böyük humanistlik göstərdi. Dəfələrlə xəbərdar etdik ki, təxribatlarınıza son qoyun. Dövlət başçımız da bu məsələdə çox böyük humanist addım atmaq istədi. Lakin özləri bunu istəmədi. Xankəndinə 10 mindən çox erməni terrorçularını gətirdilər. Bundan sonra çirkin əməllərinə başladılar. Azərbaycan hərbiçilərini, polislərini, işğaldan azad edilmiş ərazilərində terror tədbirləri həyata keçirdilər. Ona görə də ordumuzun cavab verməsi vacib idi. Bu suverən hüququmuzdur, bu hüquqdan da tam istifadə etmişik və edəcəyik də. Xankəndi bizimdi. Öz torpağımızda əmin-amanlıq yaratmaq üçün terrorçuları təmizləməliyik. Buna da başlamışıq və axıra qədər davam etməliyik. Azərbaycanın bayrağı dalğalanmalıdır. Düşünürəm ki, erməniləri heç bir güzəşt etməməliyik. Axıra qədər antiterror tədbirlərini davam etdirməliyik. İnanıram ki, biz buna nail olacağıq!”
Müsavat başqanı Arif Hacılı:
"Ölkənin bütün ərazisində dövlət suverenliyimizin bərpası, vətəndaşlarımızın təhlükəsizliyinin təmin edilməsi üçün konstitusiya və qanunlarımıza, həmçinin beynəlxalq hüquq normalarına uyğun olaraq gərəkən tədbirlərin həyata keçirilməsi Azərbaycan dövlətinin müstəsna hüququdur”.
Vətəndaş Həmrəyliyi Partiyasının sədri Sabir Rüstəmxanlı:
“Ordumuz alçaq terrorçuları Qarbağdan süpürüb atmalıdır. Allah ordumuzu və Azərbaycanımızı qorusun!”.
Azərbaycan Xalq Partiyasının sədri Pənah Hüseyn:
“Xankəndi və ətrafı elə bu gün terrorçulardan təmizlənməlidir! Vur əsgər! Canımız sənə fəda olsun!”.
AĞ Partiya sədri Tural Abbaslı:
“Qarabağda istər hərbi, istərsə də digər qüvvələr tamamilə Azərbaycan dövlətinin nəzarətində olmalıdır. Bu mütləq şəkildə olmalıdır ki, növbəti təxribatlar olmasın. Çünki Xankəndi ərazisində erməni terrorçuların mövcud olduğu müddətdə təxribatlar da davam edəcək. Hava məkanımıza müdaxilə ediləcək, ərazilərimizə yeni minalar basdırılacaq, nəticədə yenidən şəhid verəcəyik. Geosiyasi dəyişikliklər nəticəsində 1989-cu ildəki kimi separatçılar Azərbaycanda ərazi iddiasında olacaqlar".
Antiterror tədbirləri Xankəndi şəhərində uğur ilə yekunlaşmalıdır. Beləliklə də Xankəndi və digər ərazilərimiz Azərbaycanın tabeliyinə keçirilməlidir. Son nəticədə Azərbaycan bayrağı Xankəndidə dalğalanmalıdır”.
Gələcək Azərbaycan Partiyasının sədri Ağasif Şakiroğlu:
“Ermənistanın Azərbaycanın konstitusiya quruluşuna yönəlik hərbi təhdidlərinə qarşı ölkəmizin keçirdiyi lokal antiterror tədbirlərinə tamlıqla dəstəkləyirik. Bu barədə 23 siyasi partiyanın birgə bəyanatı oldu. Bu bəyanatla hər kəs tanışdı.
Silahlı Qüvvələrimiz qanunsuz hərbi birləşmələri aradan qaldırmaq üçün ciddi lokal anti-terror tədbirləri keçirilir. Mülki erməni sakinlərə toxunulmur. Azərbaycan vətəndaşı olmağa hazırlaşan bütün erməniləri qoruyur.
Bu gün yeni bir tarix yazılır. Hansı ki, gələcək nəsillər bu günü tarix kitablarından öyrənib, ordusu, xalqı, siyasi rəhbərləri haqqında məlumat alıb fəxr edəcəklər”.
Oğuz