Pakistanın Azərbaycandakı səfirliyində 27 oktyabr "Kəşmirin qara günü"nə həsr edilmiş tədbir keçirilib.
Ednews xəbər verir ki, tədbirdə müvəqqəti səfir səlahiyyətlərini icra edən xanım Sara İcaz bu günü öz müqəddəratını təyinetmə haqları uğrunda mübarizədə canlarını vermiş kəşmirlilərə ehtiram göstərmək üçün qeyd etdiyini bildirib:
"Hindistanın Cammu və Kəşmir bölgəsində törətdiyi əməllər beynəlxalq hüquq normalarının kobud şəkildə tapdalanmasıdır. Biz isə bu məsələnin dünya miqyasında işıqlandırılması üçün mübarizə aparırıq. Hazırda ərazi 700 minə yaxın hindistanlı əsgərin olduğu canlı həbsxanadır. Hər 8 kəşmirli başına 1 əsgər düşür. Bu ərazidə mövcud olan işğalçı əsgərlərin nə qədər çox olduğunu göstərir. Biz bu günü Pakistanın Hindistanın qeyri-qanuni şəkildə işğal olunmuş Cammu və Kəşmir əhalisinə dəstəyini göstərmək və BMT qətnamələrində təsbit edilmiş və vəd edilmiş öz müqəddəratını təyinetmə haqları uğrunda mübarizədə canlarını vermiş kəşmirlilərə ehtiram göstərmək üçün qeyd edirik. BMT, və BMT-nin İnsan Hüquqları Komissiyası, Human Rights Watch və s. təşkilatlar ardıcıl olaraq regional sabitlik naminə Kəşmir problemini həll etməyə çağırırlar".
Çıxışının sonunda xanım İcaz Azərbaycanın Qarabağdakı son uğurlarına görə təbrik etdi:
"Bütün Azərbaycan xalqını və dövlətini Qarabağ ərazisinin suverenliyini bərpa etməsi münasibətilə təbrik edirəm. Bilin ki, biz pakistanlılar, oxşar hadisələri paylaşdığımız üçün sizləri necə də gözəl başa düşürük".
Tədbirdə həmçinin İslam Əməkdaşlıq Təşkilatının Müstəqil Daimi İnsan Hüquqları Komissiyasının üzvü və Ombudsman Aparatının rəhbəri Aydın Səfixanlı da çıxış edib. O, Pakistan və Kəşmir xalqına başsağlığı verərək, dərin hüznünü bildirib:
"Baş verən hadisələrin 76 - cı illiyində Pakistan dövlətinə başsağlığımı diləyirəm. Ərazidə baş verən prosesləri, Qarabağda baş verən hadisələrə bənzərliyini qeyd etmək yerinə düşər ki, çəkdiyiniz acıları anlaya bilirəm. Burada da bəyan edərək bildirirəm ki, biz, Azərbaycan Respublikası olaraq, qardaş ölkəmiz Pakistanı sonuna kimi Cammu və Kəşmir münaqişəsinin tam həllində bütün sferalarda dəstəkləyir və tez bir zamanda münaqişənin həllinə ümid edirik".
Qeyd edək ki, 1947-ci ildə Hindistanın Kəşmir bölgəsini işğal etdiyi 27 oktyabr tarixi hər il Pakistanda Kəşmirin Qara Günü kimi qeyd olunur.
Əkbər Novruz
