132 illik tarixi olan bu park vaxtilə Murtuza Muxtarovun bağı olub. 1925-cı ildə bağ dövlət mülkiyyətinə, sonradan müxtəlif təşkilatların tərkibinə keçib. Hazırda Dendrologiya İnsititutu kimi fəaliyyət göstərən bu ərazi vətəndaşların istirahəti üçün nəzərdə tutulub. Ancaq parka gedənlər üçün bura heç də ürəkaçan deyil. İstirahət üçün buranı seçənlər qeyd edir ki, həm giriş pulludur, həm də içərisində kiçik bazar fəaliyyət göstərir.
“Parkda əməlli başlı bazar açıblar. Halbuki, bu park zamanında milyonçu Murtuza Muxtarovun bağ evi olub. İndi də bizlərə girmək, istirahət etmək ödənişlidir. Övladımın 5 yaşı var, bir az ətli-qanlıdır. Sual verirlər ki, neçə yaşındadır, 5 yaş dedikdə inanmadılar. Nəzarətçi israrla uşağın şəxsiyyət vəsiqəsini istədi. Problem təkcə girişin pullu olması deyil, burada əməlli-başlı bazar açılıb. Çindən gələn keyfiyyətsiz, maya dəyəri 1-2 manata olan oyuncaqları baha qiymətə uşaqlara satırlar. Bu nə dərəcədə doğru addımdır. Bura nəzarət yoxdur?”
Qurumun mətbuat xidməti ilə əlaqə saxladıq. Azərbaycan Milli Elmlər Akademiyası Dendrologiya İnstitutu İctimaiyyətlə əlaqələr şöbəsinin müdiri Tünzalə Zeyvəliyevanın verdiyi məlumata əsasən indiyədək giriş ödənişlə olub.
“Bugünə qədər Dendrologiya insititu ödənişli fəaliyyət göstərib. Giriş, 5 yaşına qədər uşaqlara, əlillərə, şəhid ailələrinə , qazilərə, akademiya işçilərinə ödənişsizdir. Ancaq 5 yaşdan 9 yaşa qədər bir manat, 9 yaşdan yuxarı şəxslər üçün iki manat təşkil edir. Bu tək bizdə belə deyil, hər bir park bu formada təşkil olunur”.
Qeyd edək ki, dünyanın 114 ölkəsindən gətirilən 1800 növə yaxın ağac və kol bitkisinin olduğu yer 24 hektar sahəni əhatə edir. Bu qədər geniş ərazinin natəmiz olması da şikayətçini narahat edən səbəblərdəndir. Şikayətçinin parkda kiçik bazarın fəaliyyəti ilə bağlı mətbuat katibi bildirib ki, burada qeyri adi heç nə yoxdur.
“Əgər kimsə bura istirahət üçün gəlirsə, sözsüz ki, biz də onların əyləncəsi xatirinə nələrsə təşkil etməliyik ki, onlar üçün maraqlı olsun. Bazar deyilən də uşaqlar üçün oyuncaqlar satılan kiçik bir yerdir. Burada qeyri adi heç nə yoxdur. Biz burada paltar, ayaqqabı satmırıq, normal olaraq uşaqlar üçün oyuncaq satılır bu da normal bir şeydir. Əgər bir problem olsa o zaman işçi cəzalandırılar və ya başqa tədbirlər görülər”.
Ləman Abbaslı
