BAMF Prezidenti Umud Mirzəyev Qənirə Paşayevanın məzarını ziyarət edib.

Ednews xəbər verir ki, II Fəxri xiyabanda Qənirə Paşayevanın məzarı üzərinə əklil qoyulub, dualar oxunub.
Ziyarətdən sonra U.Mirzəyev Qənirə Paşayeva haqqında ürək sözlərini bildirib. 
“Böyük gül çələngləri sənə olan nəhayətsiz insan sevgisinin ifadəsidir. Burada gül çələnglərinin sayı-hesabı yoxdur. Həyata vida etdiyindən iki gün keçir. Sənin həyatda qazandıqların, bu böyük, dünyaya sığmayan insan sevgisidir. Hər kəs üçün əlçatan oldun, çaba göstərdin, diqqət ayırdın. Heç kəsə fərq qoymadın. Azərbaycan üçün həyatın böyük bir mücadilələrdə keçdi. Türk dünyası üçün gecə-gündüz əlindən gələnləri etdin. Sən bir haqq savaşına çıxmış, bu yolda özünü fəda etmiş əsgər idin. 
Ruhun şad olsun, bacı! Allah sənə rəhmət eləsin! 
Sənə olan sonsuz sevgimiz, sənin əziz xatirən həmişə bizimlə yaşayacaq. Sayğılar sənə! Dəfninə yetişə bilmədim, yanında üzüqarayam. Bu gün buradayam. Ruhun şad olsun!”
Qeyd edək ki, Q.Paşayeva səhhətində yaranan ciddi problemlərlə əlaqədar sentyabrın 23-də Mərkəzi Klinikanın reanimasiya şöbəsinə yerləşdirilmişdi.
O, sentyabrın 28-də vəfat edib.
Naməlum mənşəli hipotonik vəziyyət diaqnozu qoyulan Q.Paşayevanın səhhətindəki kritik durumla əlaqədar Mərkəzi Klinikanın həkim personalı və Türkiyədən gəlmiş həkim mütəxəssislər tərəfindən görülən bütün zəruri tədbirlərə baxmayaraq onun həyatını xilas etmək mümkün olmayıb.