İyunun 10-u Beynəlxalq Avrasiya Mətbuat Fondunda (BAMF) “Dayanıqlı tədbirlərin idarə edilməsinin tərəfləri və vəzifələri” adlı təlim keçirilib. 

EDnews xəbər verir ki, təlimdə giriş sözü ilə BAMF prezidenti Umud Mirzəyev çıxış edib.  

O, çıxışında dayanıqlı inkişaf anlayışının müasir dövrdə xüsusi əhəmiyyət daşıdığını bildirib. Qeyd edib ki, bu mövzu sadəcə nəzəri yanaşma deyil, dəyişən dünyanın yeni düzənini və dünyagörüşünü ifadə edir.

“Bu, bir dünyagörüşüdür, dəyişən dünyanın yeni düzənidir. Məqsəd həm də mediada çalışan əməkdaşlarımızın yazılarda, müsahibələrdə və hazırladıqları materiallarda belə bir mövzu barədə məlumatlı olmasına nail olmaqdır”, - deyə Umud Mirzəyev bildirib.

BAMF prezidenti vurğulayıb ki, jurnalistlərin və media nümayəndələrinin maarifləndirilməsi ictimai şüurun formalaşmasında mühüm rol oynayır. Onun sözlərinə görə, BAMF bir neçə il əvvəl əlillik mövzusu ilə bağlı jurnalistlər üçün davamlı təlimlər təşkil edib və həmin təlimlər Azərbaycan mediasında müəyyən müsbət dəyişikliyə səbəb olub.

“Əvvəllər mediada "kor", "lal", "fiziki qüsurlu", "daun", "autist" kimi stiqmatik ifadələrə rast gəlinirdi. Lakin aparılan maarifləndirmə işlərindən sonra bu sahədə yazan jurnalistlərin böyük hissəsi artıq bu cür ifadələrdən uzaqlaşmağa başlayıb. Artıq "autizm xəstəliyinə tutulmuş uşaq" deyil, "autizm spektr pozuntusu olan uşaq", "Daun sindromlu şəxs" kimi düzgün terminologiyadan istifadə olunmalıdır”, - deyə o əlavə edib.

Təlimçi, Vətəndaşların Əmək Hüquqlarının Müdafiəsi Liqasının sədri, Vəkillər Kollegiyasının üzvü Sahib Məmmədov tədbirlərin təşkili zamanı ekoloji məsuliyyət, resurslardan səmərəli istifadə, maraqlı tərəflərin iştirakı və sosial məsuliyyət kimi prinsiplərin xüsusi əhəmiyyətindən söz açıb. 

O diqqətə çatdırıb ki, belə tədbirlərin planlaşdırılması və həyata keçirilməsi zamanı həm ətraf mühitə təsir, həm də sosial məsuliyyət amilləri nəzərə alınmalıdır:

“Tədbirin təşkili zamanı əsas maraqlı tərəflər olaraq, adətən, yalnız qonaqlar və iştirakçılar nəzərə alınır. Əslində isə, xüsusilə dayanıqlı tədbirin keçirilməsi zamanı bu dairə daha genişdir. İlk növbədə bu, tədbirin təşkilatçı komandasıdır. Onlar əməkdaşlar və könüllülərlə düzgün kommunikasiya qurmalı, tədbirin dayanıqlılıq aspektləri və dəyərləri üzrə aydın mövqe müəyyən etməlidirlər. İkincisi, bunlar tədbirin qonaqları və iştirakçıları (o cümlədən əlavə ehtiyacları olan şəxslər), beynəlxalq təşkilatlar, dövlət və qeyri-hökumət təşkilatları, sponsor və tərəfdaşlar, media və yerli icmalardır. Üçüncüsü, məhsul və xidmət təchizatçıları, eləcə də regional biznes nümayəndələridir. Onlar, çox güman ki, tədbirinizdə birbaşa iştirak etməyəcəklər, lakin hazırlıq mərhələsində prosesə cəlb oluna bilərlər: sizdən tədbirin təşkili üçün dayanıqlı satınalmalar, məkanın təmin edilməsi, qida və digər zəruri xidmətlərin təşkili ilə bağlı sorğular ala bilərlər”.

Sahib Məmmədov Birləşmiş Millətlər Təşkilatı və Azərbaycan Respublikası hökuməti arasında dayanıqlı inkişaf üzrə əməkdaşlığa dair çərçivə sənədinə diqqət çəkib: 

“Azərbaycan Respublikası ilə BMT-nin Ölkə üzrə İdarə heyəti arasında 24 Oktyabr 2025-ci il tarixində imzalanmış «Birləşmiş Millətlər Təşkilatı və Azərbaycan Respublikası hökuməti arasında dayanıqlı inkişaf üzrə əməkdaşlığa dair çərçivə sənədi»ndə 2026–2030-cu illəri əhatə etməklə iki strateji hədəf müəyyən edilir: İnklüziv sosial-iqtisadi artımın və insan inkişafının gücləndirilməsi, ekosistemlərin və iqlimə davamlılığın, yaşıl artımın və ədalətli keçidin təşviqi”.

Təlim çərçivəsində “Davamlı tədbir nədir?”, “Davamlı tədbirlərin təşkili zamanı maraqlı tərəflər və əsas 4 prinsip”, eləcə də “Ətraf mühitə təsir və ekoloji iz nədir?” mövzuları ətrafında müzakirələr aparılıb.  

Müzakirələr zamanı Azərbaycanın 2030-cu ilə qədər dayanıqlı inkişaf hədəfləri, BMT ilə əməkdaşlıq çərçivəsində həyata keçirilən təşəbbüslər və bu prosesdə vətəndaş cəmiyyəti institutlarının rolu barədə fikir mübadiləsi aparılıb.