Azərbaycanın Ağstafa rayonu ərazisində, Gürcüstanla sərhəddə yerləşən dəniz səviyyəsindən 850 metr hündürlükdə olan və böyük coğrafi sahəni əhatə edən qədim Keşikçidağ Alban məbədi ətrafında yaranan qalmaqal getdikcə böyüyür.

Belə ki, son günlər isə Gürcüstanın yeni prezidenti Salome Zurabişvili ərazi mübahisəsini yenidən gündəmə gətirib. Bir neçə gün əvvəl həmin bölgəyə səfər edərək Azərbaycan tərəfinə təkliflərini yenidən çatdırıb. Onun ardınca millət vəkilləri, ictimai aktivistlər, din xadimləri bölgəyə axın etdilər. Televiziyalar oradan canlı yayımlara başldılar.

Hətta bölgəyə gələn gürcü deputat Şalva Natelaşvili üzünü sərhədçilərimizə tutaraq azərbaycanlıarı təhqir etməkdən belə çəkinməyib. Belə ki, qərbyönümlü müxalif Liberal Partiyasının sədri Şalva Natelaşvili sərhədçilərimizə səslənərək belə deyib: “Sizin əcdadlarınız Orta Asiyada yaşayanda bizim əcdadlarımız burada bu mədəniyyəti qurublar.Siz Orta Asiyadan gəlibsiniz.Sizin Qafqazla heç bir əlaqəniz yoxdur”.

Daha sonra üzünü jurnanilstlərə tutaraq “bu Azərbaycanın Gürcüstana açıq-aşkar təcavüzü və işğalıdır. Rusiya bir tərəfdən Azərbaycan da bir tərəfdən bizə təcavüz edir” kimi fikirlər səsləndirib.

Gürcüstanla sərhəddə baş verən qalmaqalla bağlı Bizimyol.info-ya danışan politoloq Nəzakət Məmmədova gürcü deputat Natelaşviliyə səslənib və bildirib ki, onun düşünülməmiş pafos dolu açıqlaması iki ölkə arasındakı münasibətlərə xələl gətirə bilər:

“Bu hadisəni qınayıram birmənalı surətdə. Mən Natelaşviliyə məktub yazdım və ona aşağıdakıları bildirdim:
“Natelaşvili, bu gün Azərbaycan və Gürcüstan heç zaman olmadığı qədər bir-birinə ehtiyac hiss edirlər. Lakin siz dərk edirsinizmi ki, sizin hərəkətiniz,düşünülməmiş davranışınız iki ölkə arasındakı mehriban qonşuluq, dostluq münaaibətlərinə xələl gətirə bilər?!”.

Həmçinin politoloq əlavə edib ki, gürcü deputat Azərbaycan əsgərlərini təhqir etməkdənsə ərazilərində baş qaldıran erməni separatizmi ilə məşğul olsalar daha yaxşı olar:

“Sizin patriotluğunuz bizim düşmənləri sevindirər, sizin kimi siyasətçilərin hərəkətləri bizim münasibətlərə zərbə vura bilər. Mən sizə məsləhət görərdim ki, bizim əsgərlərimizi təhqir etmək əvəzinə Gürcüstan üçün potensial başağrısı olan məsələ – Samsxe-Cavaxetiyadakı erməni separatizmi ilə məşğul olasınız.

Cavaxetiyadakı erməni separatziminin nəticələri Gürcüstan üçün Abxaziya və Cənubi Osetiyadan da ağır nəticələnəcəkdir. Siz Azərbaycanla dostluq münasibətlərini pozmağa çalışmaq əvəzinə bu məsələlərlə məşğul olsanız yaxşı olar.

Unutmayın ki, Rusiya Gürcüstanın enerji təchizatını dayandıranda Azərbaycan sizə kömək etdi, məhz Azərbaycan sizin kilsələrə pulsuz qaz verir, Azərbaycan öz boru kəmərlərini sizin ərazinizdən çəkməsinin nəticəsidir ki, Gürcüstanın dövlət büdcəsinə sanballı miqdarda vəsait daxil olur.

Mən sizə daha ağıllı, müdrik, təmkinli olmağı məsləhət görərdim. Lakin doğrusu sizin sərhədçilərimizi təhqir etmənizdən sonra buna şübhə ilə yanaşıram”.