Qrenlandiya ABŞ prezidenti Donald Trampın müşavirləri ilə dünyanın ən böyük adasının alınması məsələsini özəl şəkildə müzakirə etdiyinə dair xəbərlərdən sonra ərazinin satıla bilməsi fikrini rədd edib.
“Biz biznes üçün açığıq, satış üçün deyil” –deyə, Qrenlandiyanın xarici işlər naziri Ane Lone Bagger “Reuters” xəbər agentliyinə bildirib.
Eurasia Diary xəbər verir ki, Tramp sentyabr ayında Kopenhagenə səfər etməlidir və Danimarkanın və ölkənin muxtar ərazisi olan Qrenlandiyanın baş nazirləri ilə danışıqlarda Arktika mövusunun yer alacağı gözlənilir.
Trampın Qrenlandiyanı almaq planı ilə bağlı ilk xəbər “Wall Stree Journal” qəzetində verilib. Vəziyyətlə tanış iki mənbənin “Reyters” agentliyinə bildirdiyinə görə, məsələ bəzi müşavirlər tərəfindən zarafat kimi qəbul edilsə də, Ağ Evin bəzi başqa müşavirləri buna ciddi yanaşıb.
Danimarka siyasətçiləri isə bu fikri lağa qoyublar. “Bu, 1 aprel zarafatı olmalıdır. Mövsümə heç uyğun deyil” –deyə, keçmiş baş nazir Lars Lokke Rasmussen Twitter səhifəsindəki mesajında yazıb.
“Danimarkanın 50 min vətəndaşını Birləşmiş Ştatlara satması fikri tamamilə gülüncdür” – deyə, Danimarka Xalq Partiyasının xarici əlaqələr üzrə sözçüsü Soren Espersen bildirib.
Danimarkanın özünü idarə edən muxtar ərazisi olan Qrenlandiya Atlantik və Şimal Buzlu okeanlar arasında yerləşir. Adanın iqtisadiyyatı Danimarka iqtisadiyyatından asılıdır. Qrenlandiya öz daxili siyasətini idarə edir, Kopenhagen isə müdafiə və xarici siyasət məsələləri ilə məşğul olur. (virtualaz.org)
