Dünyanın ən varlı adamlarından biri olan Bill Geyts dünyaya xəbərdarlıq edib.
Ednews "New York Times"-a istinadən xəbər verir ki, o, bu barədə qurumun jurnalisti Devid Uellsin suallarını cavablandırarkən danışıb.
Milyarder iş adamı Ukraynadakı müharibənin və qlobal iqtisadi çətinliklərin dünyanın iqlim dəyişikliyi ilə üzləşməsində mühüm rolu olduğunu vurğulayıb.
Bu vəziyyəti "həddən artıq təlükəli",-deyə xarakterizə edən Geyts, gözlədiyimizdən daha pis yerdə olduğumuzu bildirib.
O, həmçinin G20 sammitinin bəyanatındakı qlobal temperatur artımının 1,5 dərəcə ilə məhdudlaşdırılması vədinin real olmadığını açıqlayıb.
Dünya əhalisinin 65 faizinin Çin və Hindistan da daxil olmaqla orta gəlirli ölkələrdə yaşadığını vurğulayan iş adamı, dünyadakı tullantıların çoxunun orta gəlirli ölkələrin payına düşdüyünü deyib.
Qeyd edək ki, milyarder bu yaxınlarda iqlim dəyişikliyi ilə mübarizə çərçivəsində 4 milyard dollarlıq layihəyə başlayıb.
O, Vayominq ştatının Kemmerer şəhərində yeni obyekt quracağını açıqlayıb. Sözügedən obyekt 2025-ci ildə bağlanması planlaşdırılan kömürlə işləyən elektrik stansiyasını əvəz edəcək. ABŞ hökuməti 4 milyard dollarlıq layihənin maliyyələşdirilməsinin təxminən 50 faizini təmin edəcək. Açıqlamaya görə, 2028-ci ildə istismara verilməsi planlaşdırılan 345 meqavat gücündəki elektrik stansiyası təxminən 250 min evə xidmət göstərəcək qədər iqlimə uyğun enerji istehsal edəcək.
Nəzrin Beydiyeva
