Bir qadının partnyoru tərəfindən öldürülməsindən sonra İtaliya qadınları gender əsaslı zorakılıqdan qoruyan qanunlarına yenidən baxır. Lakin ekspertlər deyirlər ki, yeni qanunvericilik tədbirləri ölkənin ehtiyac duyduğu bir şey deyil.
Hamilə qadının xalqı şoka salan və qəzəbləndirən bir qətldə sevgilisi tərəfindən vəhşicəsinə öldürülməsindən bir neçə gün sonra, İtaliya ölkədə qadın qətllərinin sayında davamlı artımın qarşısını almaq üçün daha sərt tədbirlər gördü.
29 yaşlı Giulia Tramontano 7 aylıq hamilə idi və başqa bir qadınla gizli münasibətdə olduğu bildirilən partnyoru və körpəsinin atası, 30 yaşlı Alessandro Impagnatiello tərəfindən bıçaqlanaraq öldürülüb.
Qətlin dəhşətli təfərrüatları və Impagnatiellonun cəsədini gizlətmək cəhdləri, diqqəti polis araşdırmasından yayındırmaq səyləri ilə birlikdə, Tramontanonun qətlinin İtaliya mediası və ictimaiyyəti üçün böyük bir işə çevrilməsinə kömək etdi.
Qadının və onun doğmamış körpəsinin ölümü hökumətə çatan emosiya dalğasına səbəb oldu, Nazirlər Kabineti çərşənbə günü axşam gender əsaslı zorakılıq qurbanları ilə bağlı hüquqi prosesləri sürətləndirmək və müddəti uzatmaq üçün tədbirləri özündə əks etdirən yeni qanunvericilik paketini qəbul etdi. Bu, təqibdən əziyyət çəkən qadınların müdafiəsinə dair olan bir qanun layihəsidir.
İtaliyada gender əsaslı zorakılıq hansı səviyyədədir?
İtaliyada 1990-cı illərdən bəri ümumiyyətlə qətllərin sayı azalsa da, ailə üzvü və ya partnyoru tərəfindən öldürülən qadınların sayı yüksək olaraq qalır və son illərdə mütənasib olaraq artıb.
"Vəziyyət illərdir ki, durğundur" deyə, ölkə daxilində 100-dən çox zorakılıqla mübarizə mərkəzini və 60 qadın sığınacağını idarə edən milli assosiasiya olan Di Re- nin vitse-prezidenti Elena Biaggioni Euronews-a bildirib. "Gördüklərimiz daha şiddətli hadisələrin artmasıdır."
İtaliya Daxili İşlər Nazirliyinin son məlumatlarına görə , 2022-ci ildə ölkədə baş verən cəmi 319 adam öldürmə hadisəsindən 125-i - təqribən 39%-i cinsiyyətlə bağlı motivlərlə qadın öldürmələr, qəsdən adam öldürmələrdir.
Bu qadın qətllərinin demək olar ki, 74%-i, yəni ümumilikdə 103-ü məişət şəraitində baş verib. Qlobal məlumatlara əsasən, qadınların kişilərdən fərqli olaraq yad adamlardan daha çox ailə üzvü və ya partnyorunun əli ilə ölmə ehtimalı daha yüksəkdir.
İtaliyada qadın cinayətləri haqqında məlumat toplayan Femminicidio Italia qrupuna görə , ilin əvvəlindən İtaliyada ən azı 18 qadın qətlinin qurbanı olub.
"Qadınlara qarşı zorakılıq kişilər və qadınlar arasında qeyri-bərabərlik, stereotiplər və qərəzlər kimi struktur səbəblərdən qaynaqlanan bütün ölkələrdə az-çox mövcud olan bir fenomendir" deyə Biaggioni bildirib. "Ancaq təbii ki, İtaliya kimi maço mədəniyyətinin və cinsiyyətçiliyin daha güclü olduğu ölkələrdə bu zorakılığa başqa cür haqq qazandırılır."
Milan Universitetinin konstitusiya hüququ professoru İrene Pellizzone Euronews-a bildirib ki, "fenomen həqiqətən ciddidir və bu, bizim ölkə kimi təcrübəmizə əsaslanır". “2014-cü ilin rəsmi məlumatları göstərdi ki, 25-75 yaş arasında olan hər dörd qadından biri hansısa formada gender zorakılığına məruz qalıb və bizdə bu faizin azaldığına dair heç bir sübut yoxdur”.
İtaliyada qadınlara qarşı zorakılıqla bağlı rəqəmlər bildiriləndən daha pis ola bilər, deyən Pellizzone bildirib ki, çünki əlil qadınlar, miqrant qadınlar və narkotik asılılığından əziyyət çəkən qadınların iştirakı ilə epizodlar haqqında məlumat yoxdur.
Ülviyyə Şahin
