ER hökumətinin başçısı bildirib ki, Qarabağa ərzaq çatdırılması hələ də Rusiya sülhməramlılarının köməyi ilə həyata keçirilir.

Ednews Sputnik Armeniya-ya istinadən xəbər verir ki, Ermənistanın baş naziri Nikol Paşinyan Soçidə Rusiya prezidenti Vladimir Putinlə görüşündə Laçın dəhlizi və Qarabağdakı vəziyyəti böhran adlandırıb.

Paşinyan Putini Rusiya sülhməramlılarının Qarabağdakı məsuliyyət zonasındakı vəziyyətlə bağlı danışmağa dəvət edib.

"Biz mütəmadi olaraq görüşürük və geniş spektrli məsələləri müzakirə edirik. Bu gün biz ikitərəfli gündəlikdəki məsələləri və regional məsələləri müzakirə edəcəyik. Düşünürəm ki, bu gün Qarabağda Rusiya sülhməramlılarının məsuliyyət zonasındakı vəziyyəti də müzakirə edəcəyik. Təəssüf ki, orada humanitar vəziyyət gərgin olaraq qalır”, - Paşinyan bildirib.

Eyni zamanda Ermənistanın baş naziri qeyd edib ki, bir neçə aydır Qarabağda qaz və işıq yoxdur. Qarabağa ərzaq çatdırılması Rusiya sülhməramlılarının köməyi ilə həyata keçirilir və bu, məhduddur.

Xatırladaq ki, mayın 25-də Moskvada Azərbaycan Ermənistan və Rusiya liderləri arasında danışıqlar olub. Müzakirələrdən sonra Rusiya prezidenti Vladimir Putin bəyan edib ki, hər hansı çətinlik və problemlərə baxmayaraq, vəziyyət nizamlanmaya doğru inkişaf edir.


Dəniz Pənahova