Almaniyanın gələcək kansleri postuna əsas namizəd Fridrix Mers Donald Trampın ikinci prezidentliyi dövründə ABŞ-da baş verən son hadisələrdən "çox narahat olduğunu" bildirib.  

"EDnyus" "Politico”ya istinadla xəbər verir ki, o, bunu çərşənbə günü axşam Zingen şəhərində keçirilən mitinqdə deyib. 

Mers deyib: "Bu, artıq bizim tanıdığımız Amerika deyil".  

"O, necə ki, məmurların işdən çıxarılması, Ədliyyə Nazirliyinin və prokurorluğun fəaliyyəti, uzunmüddətli həbs cəzasına məhkum edilmiş şəxslərin əfv edilməsi Amerika üçün nəticəsiz qalmayacaq", – deyə Mers xəbərdarlıq edib.  

Onun bu açıqlaması ABŞ federal hökumətində baş verən kütləvi ixtisarlar və Trampın vəzifəyə gəldikdən sonra xarici yardımları azaltması fonunda səslənib.  

Tramp həmçinin Qəzza zolağı, Qrenlandiya və Panama kanalına nəzarəti ələ keçirmək niyyətində olduğunu, hətta hərbi gücdən istifadənin mümkünlüyünü istisna etmədiyini bəyan edib.  

Xatırladaq ki, Almaniya vətəndaşları 23 fevralda növbədənkənar seçkilərdə səs verəcəklər. Mers partiyasının ultrasağçı "Almaniya üçün Alternativ" (AfD) partiyası üzərində liderliyini qorumağa çalışacaq.  

Tramp administrasiyasında mühüm fiqura çevrilən texnologiya milyarderi İlon Mask isə Almaniya siyasətinə müdaxilə edərək seçiciləri "AfD"yə səs verməyə çağırıb.  

Dekabr ayında Mers Almaniyada Maskın fəaliyyətini "işğalçı və təkəbbürlü" adlandırmışdı. Buna səbəb Tesla-nın sahibinin "Welt am Sonntag” qəzetində çap olunan məqaləsində ultrasağçı partiyanı Almaniyanın "sonuncu ümid işığı" adlandırması olub.