Azərbaycan ilə Özbəkistan eyni kök, eyni dil və din bağına baxmayaraq dövlətlərimiz arasında diplomatik münasibətlər nisbətən gec, 2 oktyabr 1995-ci ildə yaradılıb. 1996-cı ildə Azərbaycanın Daşkənddə, iki il sonra isə Özbəkistanın Bakıda səfirliyi fəaliyyətə başlayıb. Həmin tarixdən etibarən iki ölkə arasında əlaqələrin sıx şəraitdə formalaşmadığını qeyd edə bilərik.
Ötən il Azərbaycan Respublikasının prezidenti İlham Əliyevin Özbəkistana səfəri çərçivəsində strateji tərəfdaşlığın dərinləşdirilməsi və qarşılıqlı fəaliyyətin genişləndirilməsi haqqında siyasi Bəyannamənin imzalanması iki ölkənin sahib olduğu münasibətlərin növbəti bir sferaya yüksələcəyinin ilkin göstərişi idi. Ötən gün isə Özbəkistan Prezidenti Şavkat Mirziyoyevin Azərbaycana gerçəkləşən dövlət səfərinin baş tutması sözsüz ki, bir neçə sferalarda münasibətlərin qızıl dövrünün əsasını qoymuş oldu.
İmzalanan sənədlərlə birlikdə onu göstərir ki, Azərbaycan-Özbəkistan strateji tərəfdaşlığı, siyasi-iqtisadi, sosial və hümanitar sferalara qədər çoxşaxəli istiqamətləri hədəfləyir.
Rəsmi Daşkənd özünün siyasi və hümanitar dəstəyini ifadə etmək məqsədilə quruculuq-bərpa prosesinə dəstək olaraq Füzuli şəhərində Özbəkistan Prezidenti Şavkat Mirziyoyevin təşəbbüsü ilə Özbəkistan büdcəsinin vəsaiti hesabına 960 şagird yerlik “Mirzə Uluqbəy adına 1 nömrəli məktəb” inşa edir. Bu isə həm ortaq kökümüz, dilimiz, habelə tarixi bağlarımız zəminində mədəni-humanitar əlaqələr üçün ciddi baza rolun oynayacaqdır.
Siyasi və iqtisadi əlaqələrə gəldikdə isə qeyd edə bilərik ki, imzalanan sənədlər çərçivəsində energetika, rabitə, nəqliyyat, iki ölkə arasında sərbəst sərmayə bazarlarının yaradılması yeni mərhələ çərçivəsində əlaqələri bir qədər də genişləndirəcəkdir. Ön Asiya və Yaxın Şərq regionlarında mövcud olan isti-soyuq münasibətləri nəzərə alaraq, iki ölkənin siyasi əməkdaşlığını həmçinin digər Türk dövlətləri ilə münasibətlərin də yeni mərhələlərə yüksəlməsinə ilham qaynağı olacağını deyə bilərik.
Əkbər Şəbəndəyev