Hadisələrə təkrar baxış...
Payız fəsli gəldi və Ermənistan yenidən 3 il əvvəl etdiyi səhvləri təkrarlamağa başlayıb. İlk öncə baş verən hadisələrə, daha doğrusu atılan səhv addımlara nəzər salaq...
-Ermənistan Müdafiə Nazirliyi ABŞ ilə “Eagle Partners” adı altında sentyabr ayının 11-dən 20-dək hərbi təlim keçirəcəyini vurğulayıb.
-Fransanın Ermənistan yönümlü açıqlamalar verib.
-Paşinyan italiyan nəşrinə müsahibəsində Rusiyanı bütün problemin mərkəzi kimi göstərib.
-Son və acınacaqlısı isə Ermənistan Parlamentinin “Roma Statutu”nu ratifikasiya edəcəyi ilə bağlı qərar qəbul etməsidir.
Ermənistan Rusiyaya niyə arxa çevirir?
Göründüyü kimi Ermənistan özünü geosiyasi xəritədən silinməsinə şərait yaradacaq bütün addımları atıb. Ermənistan - Rusiya münasibətləri heç bir zaman olmadığı kimi gərgin hal alıb. Rusiya mediası yazır ki, prinsipcə, ABŞ və Ermənistanın təlimlər keçirməsi faktı o qədər də qeyri-adi deyil. NATO ölkələri uzun müddətdir ki, Qafqaz dövlətləri ilə əməkdaşlıq edirlər. Lakin Kreml rəsmi İrəvana qarşı iradlarını gizlətmir, açıq şəkildə bildirir ki, bu ay Ermənistanda keçiriləcək ABŞ-Ermənistan təlimləri ilə bağlı xəbəri pis qarşılayıb. Bunu isə Rusiya Federasiyası prezidentinin mətbuat katibi Dmitri Peskov dilə gətirib.
Bundan əvvəl Ermənistan bəyan edib ki, Kollektiv Təhlükəsizlik Müqaviləsi Təşkilatının (KTMT) hərbi təlimləri onun ərazisində həyata keçirilə bilməz. Çünki bu Azərbaycan və Türkiyə arasında qalan ölkə üçün problem yarada bilər.
Əgər həqiqətəndə məsələ budursa və Ermənistan KTMT – nin digər təlimlərində iştirakı dəstəkləyirsə, bəs onun hərbçiləri Rusiya, Belarus, Qırğızıstan və Tacikistan silahlı qüvvələrinin iştirak etdiyi, sentyabrın 1-dən 6-dək keçirilən “Döyüş qardaşlığı” təlimlərində nə üçün iştirak etmədi?
Ermənilər Putinin həbsini istəyir…
Baş nazir Paşinyanın “La Repubblica” nəşrinə verdiyi müsahibədə Rusiyanı Cənubi Qafqazdakı problemlərin ana mənbəyi kimi göstərməsi və Putinin həbsini nəzərdə tutan “Roma Statusu”nu qəbul etməsi, Ermənistanın Kreml ilə əlaqələri kəsməsini hədəflədiyini göstərir.
Görünür Ermənistan özünün Qərb himayədarlarına daha çox güvənir nəinki, yanı başında olan Rusiyaya. Ermənistanın məsələyə bu prizmadan yanaşması ona heç vaxt uğur gətirməyib. Burada xatırlatmaq yerinə düşər ki, oxşar ssenari 2020 – ci ildə də yaşanıb. Ermənistan o zaman Azərbaycana qarşı hərbi təxribatlar törədir, məşhur Qərb himayədarlarına güvənərək Azərbaycana hədə - qorxu gəlirdi. Hamıya məlumdur ki, sonuncu dəfə bu hadisə baş verəndə onun üçün nəticələr heç də yaxşı sonlanmadı.
Hazırda Ermənistanın bu qədər yanlış addım atmasının bir səbəbini də qeyd edə bilərik, o da sentyabrın 17-i İrəvanda baş tutacaq paytaxt seçkiləridir. Zənnimcə Paşinyan özünə nüfuz qazanmaq naminə ölkəsinin suverenliyinin itirilməsinə səbəb ola biləcəyini başa düşməlidir.
Fransanın Erməni siyasəti…
Fransa Cənubi Qafqazda baş verə biləcək yeni savaşa birmənalı şəkildə regiona yerləşmək şansı kimi yanaşır. Onu Ermənistanın taleyi o qədər də maraqlandırmır. Hər zaman olduğu kimi ermənilər yenə də birdəfəlik kağız parçası kimi istifadə edilib atılmağa məhkumdur. Tarix boyu Ermənistan təsir mexanizmi rolunu oynayıb. Fransa siyasi dairələri ümid edirlər ki, əgər, yeni regional savaş baş verərsə, o bu bölgəyə nüfuz edərək, Cənubi Qafqazın geoiqtisadi potensialından özünə pay qopara biləcək.
ABŞ Rusiyaya qarşı…
ABŞ isə onun əksinə Rusiyanın regionda sülhü bərqərar edə bilmədiyi ilə bağlı arqumentlər axtarır. O müharibə şəraitində sadəcə Azərbaycana sanksiya tətbiq edə bilər, lakin o, da real görünmür. Qərb Azərbaycanı müharibəyə sövq etmək üçün əlindən gələni edir. Lakin hələ ki, Azərbaycan məsələyə təmkinli yanaşmaqdadır.
Sonda yenə Rusiya…
Hadisələrin gedişatına nəzər salsaq qəti şəkildə qeyd edə bilərik ki, Rusiya bu cür davranışları heç vaxt bağışlamır. Regional bir güc olaraq Ermənistanın təhlükəsizliyi sadəcə Rusiyadan aslıdır. Baş verən hadisələrə isə Kremlin hələ ki, adekvat cavab verməməsi narahatedicidir.
Bu cür qərarlar geriyə dönüşü olmayan bir yol təsiri bağışlayır. Bu şəraitdə iki hadisə baş verə bilər. Seperatçıların radikal qanadının gücləndiyini nəzərə alsaq Paşinyanın devrilməsini görə bilərik. Digər ehtimal isə Azərbaycan Silahlı Qüvvələrinin Qarabağda həyata keçirə biləcəyi anti-terror əməliyyatı və Ermənistanla yeni müharibədir.
.jpeg)
