Qərbin daha bir ikiüzlülüyünün şahidi olduq. Ötən günlərdə Aİ Qarabağdakı qondarma rejimin tanınmaması ilə bağlı maraqlı bir açıqlama yayımlayıb. Qeyd olunur ki, “Brüssel Ermənistandakı qondarma rejimi ‘hüquqi baza’ qismində tanımır, lakin Qarabağ ermənilərinin Bakı ilə nəticəyönümlü müzakirələr aparmağa qadir və buna hazır olan de-fakto liderlik ətrafında cəmləşməsi vacibdir. Brüssel "bu prosesi dəstəkləməyə" hazır olduğuna əmindir.
Gəlin indi isə buna bənzər proseslə bağlı Brüsselin növbəti bir açıqlamasına da nəzər yetirək:
“Avropa Şurasının prezidenti Şarl Mişel sentyabrın 11-də Ukraynanın işğal olunmuş ərazisində keçirilən qondarma “seçkilər”lə bağlı açıqlama verib. LNR (Luqansk) və DNR (Donetsk) adlanan rejimlər Ukraynanın beynəlxalq səviyyədə tanınmış ərazisində qanunsuz separatçı qurumlarıdır. Krım da Ukraynadır, kim nə deyirsə desin”.
Maraqlısı ondadır ki, məsələ Ukrayna Müharibəsi olduqda orada yaşayan rus xalqın hüquqları nəzərə alınmır, lakin hüquqi baza qismində etnik ermənilərin hüquqları önəmli hesab olunur. Beləliklə də, Brüssel qeyri-mütənasib fikirləri ilə Qarabağdakı məsələnin həllində çox biabırçı bir addım atmış oldu.
Məsələ ilə bağlı Ednews – a danışan siyasi – ekspert Fərhad Məmmədov, Azərbaycanın belə ikili standartlarla verilən bəyanatları qəbul etmədiyini vurğulayıb:
“Bu addım Avropa İttifaqının və Qərb vasitəçiliyinin ikili standartlarla fəaliyyət göstərməsinin bariz nümunəsidir. Lakin reallıq onu göstərir ki, onlar nə qədər ikibaşlı siyasət həyata keçirdirlərsə, bir o qədər Cənubi Qafqazda gedən proseslərdən uzaq dururlar və onların mövqeyi də nəzərə alınmır. Hər bir özünə hörmət edən dövlət və yaxud Beynəlxalq Qurum, anlamalıdır ki, əgər onun bəyanatı, yanaşması inkar edilirsə, bu onun nüfuzunun göstəricisidir. Biz görürük ki, belə bəyanatlar Azərbaycan Respublikası tərəfindən qəbul edilmir. Demək ki, belə qurumların nüfuzu Azərbaycan üçün elə də əhəmiyyətli deyil”.
Beləliklə onu qeyd edə bilərik ki, bu ikili standartlar onu göstərir ki, yalnız hərbi güc beynəlxalq hüququn ən yüksək təzahürüdür.
Əkbər Novruz
