Antiterror tədbirləri başladıqdan sonra Qərbin bir neçə ermənipərəst mediası yenidən canlanmağa başlayıb. Bir çox böyük media agentlikləri, BBC, France 24, AFP, AP, CNN və s. Böyük Britaniyanın “The Economist” nəşri də buna ideal bir nümunədir. 

Nəşrin 28 sentyabr 2023-cü il tarixli məqaləsində qısaca belə yazılır: 

“Azərbaycan erməni azlığının vətəndaş hüquqlarına zəmanət verən Qərbin dəstəklədiyi sazişə girməkdənsə, “anklav”a hücum etməyi seçərək etnik təmizləmənin günahkarıdır”.

Paralel olaraq həmin nəşriyyatın bir də 21 sentyabr 1996-cı ildə çıxardığı məqaləyə baxaq:

“Ermənilər heç yerdə “Dağlıq Qarabağdakı” qədər enerji və əzmkarlıq nümayiş etdirməyiblər. İndi Qarabağ faktiki olaraq Ermənistanın bir hissəsidir, onun 130 minə yaxın əhalisi azərbaycanlılardan tamamilə azad edilib. Ermənilər keçmiş Azərbaycan rayonlarında fəal məskunlaşırlar. Ermənilər sərt və qətiyyətli insanlardır və bu gün özlərini azərbaycanlılardan qat-qat yaxşı döyüşçü kimi göstərmişlər. Əsl lider 30 yaşlı müdafiə naziri Samvel Babayandır, kiçik, lakin amansız və cazibədardır. Samvel Babayan ekspansionistdir və hesab edir ki, Qarabağ daha da şimala doğru uzanmalıdır”.
Sözsüz Qlobal təşkilatların və siyasi güc mərkəzlərinin kəskin qərəzli mövqe tutduğu yerdə mediyadan neytrallıq gözləmək gülməli olar, çünki mediya da eyni təşkilatların və siyasi güc mərkəzlərinin əlində sadəcə faydalı alət olaraq istifadə edilir.

Lakin Qərb mediasının hələ də bütün reallıqların nümayiş etdirildiyi bir zamanda belə bir mövqe tutması sadəcə “üç meymun” (kar, kor, lal) rolunun bariz nümunəsidir. 

Birncisi BMT tərəfindən dəfələrlə Azərbaycan torpağı kimi müəyyən edilən Qarabağ bölgəsinin Ermənistan tərəfindən işğalı aydın ifadələrlə vurğulanmır. Ermənistanın orada olması BMT tərəfindən “işğal” kimi müəyyən edilsə də, onlar Ermənistanın niyə bütün bu illər ərzində sözügedən bölgəni sülh yolu ilə boşaltmadığı sualına lazımi diqqəti yetirmirlər.

İkincisi Qarabağ ərazisindən Ermənistana gedən mülki vətəndaşların könüllü olaraq tərk etməsini, Qərb mediası bu cür ifadələrlə nümayiş etdirir: “etnik təmizləmə”, “soyqırım”. Ən gülməlisi və özünü ən çox təkzib edəni isə, Azərbaycan hökümətinin bütün beynəlxalq cəmiyyətə bəyan edərək, bildirdiyi “Etnik ermənilərə bütün imkanlar təmin ediləcək, getmək istəyənlər isə ərazini tərk etməkdə sərbəstdirlər”, fikrinə bir növ “iddia”, “subyektiv fikir” kimi baxılmasıdır.
Üçüncüsü beynəlxalq mediaya bağlı jurnalistlər münaqişəni izləmək üçün əsasən Ermənistan tərəfinə getməyi seçiblər və bunu davam etdirirlər. Halbuki, regionda münaqişəni hər iki tərəfdən izləmək lazım idi. Yalnız bir tərəfdən xəbər vermək təbii olaraq qərəzliliyi də gətirir. 

Gördüyümüz kimi, Qərb Gürcüstan, Moldova və Ukraynada münaqişənin öz ərazi bütövlüyü əsasında həllini birmənalı şəkildə dəstəkləsə də, ikiüzlü şəkildə Ermənistan-Azərbaycan münaqişəsinə qondarma prinsip əsasında fərqli yanaşma təklif edib.

Bütövlükdə qlobal əhatəyə malik yüksək nüfuzlu media qurumlarının özlərini belə qərəzli yanaşmalara məhkum etmələri jurnalistika standartları baxımından böyük məyusluq mənbəyidir. Ələxsus bu erməni lobbisinin çirkli pulları ilə hədəflədiyi iyrənc planlarıdır. Bütün bunlar nəinki indi, 44 günlük müharibədə də, ondan əvvəl də nümayiş  etdirilirdi.

İllər boyunca Xocalıda, Qarabağda əziyyət çəkən, təcavüzə, qətlə məruz qalan insanlarımızın səsi çatdırılmadı. Bəlkə də bütün bunları nümayiş etdirməkdə çətinlik çəkdik. Lakin artıq bütün reallıqlar göz önündədir. Son günlər də ikiüzlü xəbərlər çıxaran böyük media orqanları da məsələnin həqiqətini öyrənib çatdırmağa başlayıblar. BMT beynəlxalq missiyasının da regiona gəlişi artıq həmin o,”The Economist” kimi qərəzli mediya qurumlarının, Ermənistanın iyrənc uydurma tarixlərinin sonunu gətirəcək.

Əkbər Novruz