Sülh - yaşadığımız dünyanın mövcudluğu və davamlılığıdır.
Günü-gündən dəyişən dünyamızda təəssüflər olsun ki, bəzən səriştəsiz, amansız və hətta daha da irəli gedərək deyə bilərəm ki, daxili şeytan, xarici insan olanlara hesab, haqsızlıq və amansızlığın, terrorun və müharibələrin qurbanlarına çevrilərək həyatı qaralan insanlar var. Bütün bunların qarşısının alınmasında isə sülhün rolu danılmazdır. Ən kiçik ailəvi hətta məhəlli münaqişələrdən başlamış yüzillik müharibələrədək hər cür qarşıdurma yalnız sülhlə sona çatmalıdır. Buna görə də sülh bütün vasitələrin fövqündə dayanır. Ona nail olmaq, bu amal uğrunda çalışmaq isə, deyərdim ki, əsl fədakarların, xüsusi canfəşanlıqla humanizm dəyərlərini əldə sülh bayrağın tək gəzdirən, ali məqsədli insanların işidir. Bu uğurda təbii ki, tərəflərin həqiqətləri düzgün dəyərləndirmələrindən də çox şey asılıdır.
Bəşəri rəmzə çevrilərək insanların arzu etdiyi və can atdığı bütün müsbət keyfiyyətləri özündə birləşdirən sülhün dəyəri zaman keçdikcə, yeni münaqişə ocaqları yarandıqca daha çox üzə çıxır.
Bir anlıq düşünün ki, bütün dünyada insan zorakılığının baş verməsinin tam qarşısı alınıb, ön cəbhələrdə silahlar susub nəinki ailələrdə, məktəblərdə, ictimaiyyətdə münasibətlərin sağlamlaşmasına, sülhün mövcudluğuna qarşı olan hər bir təhdit aradan qaldırılıb. Xəyal etməsi belə gözəldir. Deyilmi? Yaşından, irqindən, milliyyətindən, dinindən və cinsindən asılı olmayaraq, sülh istəyən hər kəsin haqqıdır ən gözəl olanı yaşamaq və gələcək nəsillərə xoşbəxtliklərlə dolu bir dünya ərmağan qoymaq.
Təəssüf hissi ilə qeyd etməliyəm ki, hələ də dünyada bir çox insanların hüquqları xüsusilə silahlı münaqişələr zamanı və atəşkəs dövründə pozulmaqda davam edir. Buna görə də biz bu və bənzəri səbəblərdən dünyası qaralanlara və xoşbəxt gələcəyə xatir xilasın adı olan sülh üçün çalışaq və ya bu amal üçün çalışan insanlara güclü dəstək olaq.
Sülh bəşəriyyətin ehtiyac duyduğu ən qiymətli vasitə olmaqla yanaşı, həm də BMT-nin ali vəzifəsidir.
Sülh naminə aparılan fəaliyyət həyati əhəmiyyət kəsb etsə də, təəssüflər olsun ki, heç də hər yerdə qorunmur, müdafiə edilmir, zorakılıqlar baş alıb gedir, milli münaqişələr daha da qloballaşır, coğrafiyası genişlənir. Bunu böyük ürək ağrısıyla qeyd etməliyəm ki, hələ də dünyamızda saysız-hesabsız insanlar üçün sülh əlçatmazdır.
Vətən müharibəsində, öz haqq davasında inamlı və əzmli qələbə qazanan Azərbaycanımızda sülhün əbədi olması və münaqişənin səngiməsi, atəşkəs rejiminə bədnam qonşumuz tərəfindən əməl edilməsi təkcə insanların əmin-amanlıq şəraitində yaşaması deyil, eyni zamanda inkişaf, tərəqqi, bəşəri təhlükəsizliyə təminatdır.
Sülhün və təhlükəsizliyin təmin olunması istiqamətində həyata keçirilən tədbirlər nəticəsiz qaldıqca insanlar qorxu, vahimə narahatlıq içərisində yaşamalağa davam edir. Ermənistan nəinki atəşkəsə əməl etmir, nüfuzlu beynəlxalq təşkilatların sülhün və təhlükəsizliyin bərpası istiqamətində apardığı siyasətə də kölgə salır.
Sülhün carçıları olan göyərçinlərin bayraqlarını bəzədiyi yüzlərlə təşkilat dünyanın müxtəlif bölgələrində bu ali məqsəd- sülh üçün çalışır.
Artıq 30 ildir bu məşəqqətdi yolda məhz sülh üçün bir an belə olsun yorulmadan addımlayan və Azərbaycanımızın haqq səsini hər zaman dünya ictimaiyyətinin diqqətinə çatdıran Beynəlxalq Avrasiya Mətbuat Fondudur. Fond müxtəlif ölkələrdən olan bir qrup jurnalist tərəfindən yaradılan müstəqil bir təşkilatıdır. 1992-2022 tam olaraq 30 ildir BAMF BMT qurumları, Amerikanın Dövlət Departamenti, Avropa Komissiyası, Dünya Bankı, Beynəlxalq Mətbuat İnstitutu, Beynəlxalq Jurnalistlər Federasiyası, bir sıra xarici ölkələrin Azərbaycan Respublikasındakı səfirlikləri, nazirliklər, agentliklər, eləcə də regiondakı yerli və beynəlxalq qeyri-hökumət təşkilatları ilə əməkdaşlıq çərçivəsində fəaliyyət göstərir. Çox təəssüf ki, hələ də bəşəriyyətin tam təhlükəsizliyi təmin olunmayıb və Beynəlxalq Avrasiya Mətbuat Fonduna yenə də böyük öhdəliklər düşür. Təkcə ölkədə deyil cahanda da sülh deyən və ali məqsəd üçün fəaliyyət göstərən təşkilat dünəndə olduğu kimi bu gün də, sabah da öz ali məramından geri qalmayacaqdır.
Unutmayaq ki, hələ də ayrı-ayrı regionlarda, ümumilikdə isə dünyanın bir çox bölgələrində münaqişələr davam etməkdə, torpaqlar qan çanağında boğulmaqda, günahsız uşaqlar və gənclər odsaçan silahların qurbanlarına çevrilməkdədir.
Və sonda bir daha qeyd etmək istəyirəm ki, Sülh - əmin-amanlıq, asayiş! Sülh - bolluq, bərəkət, firavanlıq! Sülh - sevinc, səadət, şadlıq! Sülh - ağ göyərçinlərin mavi səmalarda uçuşu, körpələrin üzünün təbəssümü, uşaqların şaqraq gülüşləridir! Qoy “Sülh zəngi” əbədi səslənsin!
Esevər Məmmədov
Araşdırmaçı-jurnalist
