İsraillə HƏMAS arasında toqquşmalar 10-cu gündür davam edir. Hücumlarda 750-si uşaq olmaqla 2670 fələstinli həyatını itirdiyi halda, İsraildə ölənlərin sayı 1300-ü ötüb. İsrail ordusu gecə boyu Qəzza zolağının müxtəlif hissələrini bombalamağa davam edib. Təxminən 2,5 milyon insanın yaşadığı Qəzzada insan faciəsi günü-gündən dərinləşir.
Ednews son 24 saatda İsrail-Qəzza xəttində baş verənləri təqim edir:
HƏMAS-ın silahlı qanadı İzzəddin Əl-Qəssam Briqadalarının oktyabrın 7-də səhər saatlarında İsrailə qarşı başlatdığı “Əqsa tufanı əməliyyatı” hücumundan sonra bölgədə qarşıdurmalar 10-cu gündür davam edir.
İsrail ordusu Qəzzanın şərqini, Şucaiyye və Zeytun məhəllələrini və şəhərin şimalını intensiv bombardman altında saxlayıb. Bildirilib ki, hava zərbələrində xüsusilə əsas yolların hədəf alındığına diqqət çəkib.
İsrailin cənubu gecə boyu HƏMAS-ın hücumlarının hədəfi olub. Təl-Əviv və Aşkelon səmalarında partlayış səsləri eşidilib. Dəmir Qübbə HƏMAS-ın havaya atdığı raketləri məhv edib. Bat Yam və Aşkelona düşən raketlər maddi ziyana səbəb olub.
Səhər saatlarında İsrail İordan çayının qərb sahilində və bir çox başqa nöqtələrdə əməliyyatlar həyata keçirib. Onlarla fələstinli saxlanılıb.
İsrailin bombardmanları gücləndikcə morqlar və xəstəxanalar dolub-daşmaqdadır. Ölən və yaralanan uşaqların sayı sürətlə artır. Xəstəxanalar yaralılara yardım göstərməkdə çətinlik çəkir. Elektrik enerjisi, su və ərzaq qıtlığı artır. İsrailin bombardmanları nəticəsində yaxınlarını itirən, evləri dağılan qəzzalılar ümidsizliyə qapılıblar.
İsraildə HƏMAS tərəfindən girov götürülənlərin ailələrinin həyəcanlı gözləməsi davam edir. Raket hücumlarının davam etdiyi İsrail şəhərlərində panika və qorxu davam etməkdədir.
İsrailin Livanla sərhədi Livan Hizbullahı ilə İsrail ordusu arasında toqquşmalara səhnədir. Livandan İsrailə raket hücumu olub. İsrail hücuma məruz qalan nöqtələri vurduğunu açıqlayıb. İsrail ordusu mülki əhalini Livan sərhədinə 4 km-dən çox yaxınlaşmamağa çağırıb.
ABŞ prezidenti Co Bayden İsrailin Qəzzanı işğal etməsinin böyük səhv olacağını bildirib. HƏMAS-ın tamamilə məhv edilməsi lazım olduğunu bildirən Bayden, "Bölgədə Fələstin dövləti də olmalıdır" deyə bildirib.
Fələstin prezidenti Mahmud Abbas qeyd edib ki, İsrailin Qəzzaya hücumları dərhal dayandırılmalı və təcili humanitar yardım dəhlizlərinin açılmasına icazə verilməlidir.
Mahmud Abbas HƏMAS-ın hərəkətlərinin Fələstin xalqını təmsil etmədiyini bəyan edib. Abbas bildirib ki, fələstinlilərin yeganə nümayəndəsi Fələstin Azadlıq Təşkilatıdır. Fələstin prezidenti İsrail və HƏMAS müharibəsində mülki insanların ölümünü pisləyib. O, hər iki tərəfi “Girovları və məhbusları azad edin” çağırışı edib.
İsrail Ordusunun sözçüsü Daniel Həcəri, Qəzzadakı 600 min fələstinlinin Həmas Hərəkatı ilə müharibə səbəbilə şəhərin cənubuna keçdiyini bildirib.
İsrail ordusunun yaxın günlərdə Qəzza zolağının şimal hissəsini intensiv şəkildə hədəf alacağını ifadə edən Həcəri, “Dünyanı əmin edə bilərəm ki, biz beynəlxalq hüquqa uyğun hərəkət edərək, əməliyyata qarışmayan vətəndaşlara ən az ziyan vuraraq hərəkət edirik. Bizim düşmənlərimizdən fərqimiz budur”, deyə vurğulayıb.
Xarici işlər naziri Hakan Fidan ilə ABŞ dövlət katibi Antoni Blinken arasında telefon danışığı olub. Görüşdə Fələstin və İsrail kontekstində son hadisələr və Qəzzada humanitar vəziyyət müzakirə edilib. Hər iki nazir regiona səfərləri ilə bağlı təəssüratlarını bölüşüblər.
SON DƏQİQƏYƏ OLANLAR:
İsrail HƏMAS-ı Qəzza zolağının şimalından təxliyə olunan mülki şəxslərin karvanına hücum etməkdə ittiham edib.
Bu barədə İsrail Müdafiə Ordusunun (SAXAL) sözçüsü Conatan Konrikus məlumat verib.
Onun sözlərinə görə, HƏMAS yaraqlıları oktyabrın 13-də Qəzza zolağının şimal hissəsindən təxliyə olunan karvanı atəşə tutaraq 70 dinc sakinin ölümünə səbəb olublar:
“Biz mülki vətəndaşlardan ibarət heç bir karvanı atəşə tutmamışıq və bizdə olan məlumata görə, bu həmlə HƏMAS tərəfindən həyata keçirilib. Əgər beynəlxalq arenada bu onların xeyrinə olacaqsa, düşünmürəm ki, onlar üçün dinc sakinləri öldürmək problem olsun”, - C.Konrikus vurğulayıb.
Oğuz