entaqon rəhbəri Pit Heqset Breitbart Ukraynanın nüvə silahı əldə edə biləcəyini istisna etmir. O bildirib ki, belə bir qərarın verilməsi son nəticədə bütünlüklə Prezident Donald Trampdan asılıdır.
Ukrayna Prezidenti Volodimir Zelenski Rusiyanın növbəti işğalçılıq siyasətindən müdafiə olunmasıı üçün iki yolu qaldığını bildirib - "Kiyev ya NATO-ya üzv qəbul edilməli, ya da ölkə nüvə silahına sahib olmalıdır”. Zelenski onu da əlavə edib ki, "NATO-ya üzvlük onillərlə uzana bilər, ona görə də qoy onlar bizə nüvə silahı versinlər”.
Ona cavab olaraq, Pentaqon rəhbəri Heqset vurğulayıb ki, bu kimi məsələlərin həlli Prezidentin səlahiyyətində olan məsələdir.
Aydındır ki, Zelenski indiki vəziyyətdə Ukraynanın təhlükəsizliyinin təmin edilməsinə çalışır. ABŞ rəsmiləri isə bu günlərdə Kiyevin NATO-ya üzv olmayacağını bəyan edib. Belə olan halda Zelenski də ölkəsinin təhlükəsizliyinə nail olmaq üçün bütün vasitələrdən istifadə etməyə səy göstərir.
Bu səbəbdən də nüvə silahı əldə edilməsi təklifini növbəti dəfə gündəmə gətirib. Bu müstəvidə Pit Heqsetin Ukraynanın nüvə silahı əldə edə biləcəyini istisna etməməsi heç də Kiyevin gələcəkdə bu silaha sahib olacağı anlamına gəlməməlidir. Pentaqon rəhbəri bu fikri ola bilsin ki, rəsmi Kiyevi sakitləşdirmək üçün səsləndirib.
Digər tərəfdən, ola da bilər ki, həmin fikir yaxınlarda başlanması gözlənilən Ukrayna - Rusiya danışıqlarında ikincinin öz aqressiv şərtlərini bir qədər yumşaltması üçün ona təzyiq göstərmək məqsədi daşıyır - Moskva danışıqlarda müəyyən qədər yumşaq mövqe sərgiləməsə, gələcəkdə nüvə ölkəsilə həmsərhəd olacaq.
Pentaqon rəhbəri Ukraynanın nüvə silahı əldə etməsi qərarının son nəticədə Prezident Donald Trampdan asılı olduğunu deməsi isə ABŞ-ın yeni dövlət başçısının nüfuzunu daha da qaldırmağa hesablanmış addımdır.
Bununla o bir daha göstərmək istəyir ki, danışıqlar Trampın istəyinə uyğun getməlidir. Ukraynanın nüvə silahə əldə etməsi isə mövcud şəraitdə mümkünsüzdür. Çünki bu halın regionda vəziyyətin sabitləşməsindən və Rusiyanın geri çəkilməsindən daha çox, hətta Avropa İttifaqı ölkələrinin belə ciddi təhdidlə üz-üzə qalmasına gətirib çıxaması ehtimalı daha böyükdür. Hazırkı situasiyada Ukraynanın təhlükəsizliyi üçün qarantiya rolunda ancaq və ancaq Aİ-nin sülhməramlı qüvvələri oynaya bilər. ABŞ-ın özünü kənara çəkməsi, Kiyevin nüvə silahı istəyinin reallaşmasının gerçəkdən uzaq olması fonunda, məhz Avropa qüvvələrinin Ukraynada sülhməramlı adı altında yerləşməsi Rusiyanın növbəti təcavüzünün qarşısını almaq qüdrətində ola bilər.
