Ermənistanda baş verən son proseslər revanşist qüvvələrin aktiv fazaya keçdiyini göstərir. Belə ki, ölkə daxilində yenidən ASALA və VOMA kimi terror təşkilatları yenidən gündəmə gətirilir. Erməni politoloq Aram Poqosyanın Ermənistan KİV-ə açıqlamasında səsləndirdiyi fikirlər də bunu sübut edir. Politoloq qeyd edib ki, “proksi qüvvələrin” orduya inteqrasiyası təmin olunmalıdır.
Azərbaycan məsələ ilə bağlı hansı önləmləri almalıdır? Bu proses yeni müharibənin çağırışçısı ola bilərmi?
Hərbi ekspert Abuzər Əbilov Ednews – a açıqlamasında irəli sürülən bu fikrin olduqca təhlükəli olduğunu qeyd edib:
“ASALA təşkilatının yaşı kiçik deyil. Həmçinin VOMA-da yeni yaradılan terror təşkilatıdı. Onların maliyyə ehtiyatlarını incələdikdə görə bilərik ki, böyük bir dövlətin büdcəsi qədərdir. Dünyada olan erməni lobbisinin gücü hər birimizə aydındır və bu təşkilatların maliyyələşdirilməsində onların birbaşa payı var. Dünyanın hər bir nöqtəsində olan ermənilərin hər birinin məqsədi eynidir: dənizdən dənizə uzanan “Böyük Ermənistan” xülyasını gerçəkləşdirmək. Nəzərənizə çatdırım ki, hətta bu istək və ya arzu deyil, tamamilə bir konsepsiyadır. Bunun fonunda da Vartanovun təsis etdiyi VoMa təşkilatı aysberqin hələlik üst hissəsidir deyə bilərəm. Lakin həmin aysberqin alt hissəsi, üst hissəsindən də böyükdür. ASALA təşkilatı isə düşünürəm VoMa ilə müqayisədə heç bir təqdimata ehtiyacı olmayan bir terror təşkilatıdır. Yaxın Şərqdə günümüzdə də böyük düşərgələri var. Keçmişdən günümüzə kimi gəlib çatmış qlobal bir təhlükədir. İrəli sürülən, terror təşkilatlarının Ermənistan ordusuna inteqrasiya edilməsi olduqca təhlükəli bir konsepsiyadır”.
Ekspert hesab edir ki, bu prosedura artıq başlayıb və Azərbaycan xalqı hər zaman hazırlıqlı olmalıdır:
“Ermənistanın qanunlarına baxsaq sivil bir dövlət üçün normal qanunlardır. Lakin Ermənistan qanunlarında bir də alt qanunlar vardır. Əfsuslar olsun ki, hazırki Ermənistan rəhbərliyi həmin bu alt qanunların qarşısını almaqda acizdir. Onların orduya və ya dövlətin digər strukturlarına müdaxilə etmək üçün qarşılarında böyük qüvvələr var. Zənnimcə bu məlumatlar bir siyasətçi tərəfindən dilə gətirilirsə bu, o deməkdir ki, artıq proses başlayıb. Azərbaycan ordusu da bu cür proseslərdə hər zaman hazırlıqlı olmalıdır. Bütün bu prosedura NATO daxilindəki ölkələr kimi ciddi nəzarət altına alınmalıdır. Çünki dünya nizamında baş tutan son hadisələrə nəzər yetirsək fikrimcə bizi uzun müddətli münaqişələr gözləyir. Ordu təminatında könüllük prinsipi gündəmə gətirilməlidir”.
Əkbər Novruz
