Şirak yeparxiyasının rəhbəri Mikael Ajapayan heç kimin Ermənistanı nəzərə almadığından şikayətlənib və ölkə əhaisini başqalarına güvənməməyə çağırıb. Belə ki, o, ölkənin fəlakətə doğru getdiyini görən bu vətənpərvər qüvvələrin, təhlükəsizlik qüvvələrin müəyyən addımlar atmasına çağırıb.
“Əgər təhlükəsizlik qüvvələri bunu görüb baş verənlərin qarşısını almırsa, deməli, ölkəni düşünmürlər. Mən Vətəni xilas etməkdən danışıram, kimisə cəzalandırmaqdan danışmıram”, deyə bildirib.
Məsələ ilə bağlı Ednews-a danışan erməni siyasi şərhçi İşxan Verdiyan söyləyib ki, Paşinyan artıq daşnakların erməni xalqı üçün qoyduğu siyasi yolla getməyəcək:
“Müxalifət qüvvələri Ermənistandakı vəziyyəti fəlakət kimi səciyyələndirirlər və hansı ki bu, həqiqətən də fəlakətdir. İndi açıq şəkildə demək olar ki, baş nazir Nikol Paşinyan daşnakların erməni xalqı üçün çəkdiyi yolla getməyəcək. Ermənistan geosiyasi xəritədə onun üçün hazırlanmış yeri tərk edir ki, bu da buranı Ermənistan üçün hazırlayanların narazılığına səbəb olmaya bilməz.
Başa düşmək lazımdır ki, ölkəni türkofobiyaya, qonşulara nifrət çərçivəsinə uyğun saxlamaq üçün nəhəng resurs israf edilir, indi isə belə çıxır ki, əslində bu resurslar boş yerə sovrulur. Vəziyyətə Ajapayan və onun kimilərin gözü ilə baxmaq lazımdır: mərkəz onlara külli miqdarda pul ayırır, amma nəticə isə sıfırdır. Bu, Ajapayanlar üçün fəlakətdir. Çünki birdən-birə mərkəz onların ciblərinə qoyulan pulların nəticəsini soruşsa, hərçənd xaos yaranacaq. Yəni onlar üçün açıq şəkildə bəyan etdikləri vəziyyət doğrudan da fəlakətlidir”.
Əkbər Novruz
