Quru Qoşunlarının 2024-cü il üçün hazırlıq planına uyğun olaraq artilleriya bölmələri ilə taktiki-xüsusi təlimlər keçirilir. Təlim planına uyğun hərəkətlər xəritədə dəqiqləşdirildi, yaranmış taktiki vəziyyətdən çıxış edərək qəbul edilmiş qərarlar barədə zabitlərin hesabatları dinlənildi.
Ednews xəbər verir ki, daimi dislokasiya məntəqələrindən həyəcan siqnalı ilə çıxarılmış bölmələr toplanma rayonlarına çataraq marşrut boyunca müxtəlif maneələri gecə görmə cihazlarından istifadə etməklə dəf edərək, atəş mövqelərinin tutulması, döyüş texnikası və artilleriya qurğularının döyüş hazırlığı vəziyyətinə gətirilməsi üzrə fəaliyyətləri yerinə yetirdilər.
Hərbi qulluqçuların bilik və bacarıqlarını artırmaq, həmçinin artilleriya bölmələrinin idarə olunması üzrə komanda heyətinin bacarıqlarını təkmilləşdirmək məqsədilə keçirilən təlimlərdə hərbi qulluqçular yüksək peşəkarlıq nümayiş etdirirlər.
