İyulun 24-də təlim-məşq uçuşları keçirən Hərbi Hava Qüvvələrinin MiQ-29 təyyarəsinin qəza xəbəri hər kəsi sarsıtdı. Axı o təyyarədə Azərbaycan Ordusunun 100 illiyinə dair keçirilən möhtəşəm hərbi paradda Bakı səmasında insanları heyrətləndirən uçuşlar, manevrlər etmiş Rəşad Atakişiyev var idi...

Hər kəs onun sağ-salamat ailəsinə, vətəninə, öz işinin başına dönəcəyinə çox böyük ümid bəsləyir. Elə onu hər gün anasından soruşan 7 yaşlı oğlu Turqay kimi.

Turqayın babası, Rəşad Atakişiyevin qayınatası Qabil Hüseynli azyaşlı nəvəsinin atası ilə bağlı verdiyi sualların qarşısında acız qaldığını deyir:

Eurasia Diary xəbər verir ki, Baku TV-nin əməkdaşları pilotun evində olub, onun həyat yoldaşı Könül Atakişiyeva və qayınanası Məhbubə xanımla söhbətləşiblər.

Məhbubə xanım kamera qarşısında danışmaqdan imtina etsə də, Rəşaddan ürək yanğısı ilə söz açıb. Qayınanası deyir ki, Rəşad ailəsinə, övladlarına bağlı biridir. Hətta işdən kənar 1 saat vaxtı qalanda da bu zamanı mütləq onlarla birlikdə keçirməyi sevir.

Elə xanımı Könüllə də sevib ailə həyatı qurub:

“Gözləyirik biz. Allahdan möcüzə istəyirik. Rəşad güclü insandır”.

Qabil Hüseynli isə deyir ki, Rəşad çox yumşaq xasiyyətli adamdır:

“Nizam-intizamı çox sevir, kollektivdə də böyük hörmət qazanıb. Komandiri deyir ki, hansı işə buyursaq, Rəşad ona “baş üstə” deyir və o işi layiqincə yerinə yetirir. Onun bir dəfə də olsun nəyəsə etiraz etdiyini görməmişik”.

Qeyd edək ki, Rəşad Atakişiyevin 3 və 7 yaşında 2 oğul övladı var. 

Qeyd edək ki, iyulun 24-də saat 22 radələrində plana uyğun olaraq gecə vaxtı təlim-məşq uçuşları keçirən HHQ-nin MiQ-29 təyyarəsi ilə qəflətən rabitə əlaqəsi kəsilib və aviasiya vasitəsi radarlardan itib. İlkin ehtimala görə, aviasiya qəzası nəticəsində hərbi təyyarə Xəzər dənizinə düşüb.

Qəza nəticəsində MiQ-29 təyyarəsinin pilotu polkovnik-leytenant Rəşad Atakişiyev itkin düşüb.