Ötən gün “Azərsun Sənaye Parkı”nda baş verən yanğın təhlükəsizlik tədbirləri ilə bağlı məsələləri bir daha aktuallaşdırıb. 

 

Qeyd edək ki, Sumqayıtda baş verən yanğın Bakıda gecə klubunda baş verən partlayışdan sonra artıq ikinci bədbəxt hadisədir. 

 

Bəs, idarə və müəssisələrdə təhlükəsizlik qaydalarına necə riayət etmək lazımdır? 

 

Təhlükəsizlik məsələləri üzrə ekspert Elmar Nurəliyev Ednews-a açıqlaması zamanı bildirib ki, heç kim və eləcə də müəssisə bədbəxt hadisədən sığortalamayıb, ancaq ilkin tədbirlər görməklə bunun qarşısını almaq olar. 

 

 

“Yanan maddə, oksigen və istilik bir yerdə olduqda avtomatik yanğın əmələ gəlir. Bu baxımdan bütün idarə və müəssisələrdə yanğın təhlükəsizliyi haqqında qaydalara çox ciddi riayət olunmalıdır. Yanğınsöndürmə avadanlıqları, mexanizm qurğuları, datçiklər, elektron və siqnalizasiya vasitələri, təyinatından asılı olaraq avtomatik yanğın siqnalizasiya qurğuları, yanğın hidratları, su dolabları və su çəni kompleks olaraq yanğın təhlükəsizliyi sistemidir ki, bütün idarə və müəsisələrdə xüsusilə sənaye müəssisələrində, zavod, fabrik, anbarlarda, əsas da kimyəvi tərkibli məhsullar saxlanılan anbarlarda bu yanğın sistemləri qurulmalıdır. Burada çalışan işçilər də yanğın təhlükəsizliyi barədə məlumatlı olmalıdır”.

 

Ekspert Türkiyədə aylarla davam edən meşə yanğınlarını və İranda zavodda günlər çəkən güclü yanğınları xatırladıb. O, söhbət zamanı qeyd edib ki, FHN-nin yanğınsöndürmə komandası yanğının qarşısının səhər saatlarında almaqla peşəkarlıq nümayiş etdiriblər, yoxsa günlərlə davam edə bilərdi. 

 

“Hansısa ofisdə baş verən yanğınla sənaye müəssisəsindəki yanğını eyniləşdirmək olmaz. Sənaye müəssisəsində, bu, dəhşətli faciəyə gətirib çıxarır. İstifadə olunan dəzgahlar, mal və materiallar, mürəkkəb mühəndis konstruksiyaları, kimyəvi tərkibli xammallar yanmaya, partlamaya, tez alışmağa meylli maddələrdir. Sənaye müəssisələrində məişət tullantıları ilə kimyəvi tullantılar eyni poliqona atılmamalıdır və daşınması da ayrıca həyata keçirilməlidir. Elə kimyəvi tullantı var ki, öz-özünə, günəş şüasından belə alışa bilir. Sənaye müəssisəsində yanğın hətta günlərlə davam edə bilir, 10 metrlərlə alov havaya qalxır, 1000 kvadrat metr ərazini əhatə edir. Bu yanğına yaxınlaşmaq təhlükəlidir və ayrılan tüstü belə toksikidir. Bu zaman ilk növbədə insanlar təxliyyə olunur, sonra yanmaya və partlamaya meylli maddələr  uzaqlaşdırılır, daha sonra yanğının daha geniş ətrafa yayılmasının qarşısı alınır, sonda isə yanğının mərkəzinə nüfuz etməklə söndürülməsinə cəhd göstərilir. Belə güclü yanğında ətrafda 1000 dərəcə istilik olur və insan ona yaxınlaşa bilmir”. 

 

Ekspert qeyd edib ki, harada bir boşluq olarsa hadisənin baş verməsi gün məsələsidir. 

 

“Bu kimi hallarla üzləşməmək üçün digər bu cür obyektlər daha diqqətli olmalıdırlar. Yanğın emalı üçün istifadə olunan xammal yüksək yanma qabiliyyətinə malikdir. Xüsusi risk olan yerlərdə xüsusi siqnalizasiya vasitələri var ki, istilik, qığılcım, tüstü olan kimi kibriti belə çəkəndə avtomatik işə düşür, insan müdaxilə etmədən o yanğının üzərinə kimyəvi məhlul buraxılır və söndürülür”.  

 

Qeyd edək ki, ötən gün 17:00 radələrində Sumqayıt şəhərinin Hacı Zeynalabdin qəsəbəsində yerləşən "Azərsun Sənaye Parkı”nın ərazisində baş vermiş yanğın bu gün saat 08:24-də söndürülüb.

 

Gülnar Səlimova