Sosial şəbəkələrdə “Zabitlər” parkında ağacalrın kütləvi şəkildə qırılması ilə bağlı videogörüntülər yayılıb. Görüntülərdə kötüyündən kəsilən ağaclar aydın şəkildə görünür.
Məsələni araşdırmaq üçün ərazidə olan Ednews saytının əməkdaşları videoda əks olunan görüntülərə canlı şahidi olublar. Araşdırma nəticəsində məlum olub ki, həqiqətəndə parkın ərazisində bitən ağaclar məhv edilib.
Şahidlərin sözlərinə görə “təmizlənmə” işləri həmin ərazidə kafe-restoran kimi obyektlərin tikilməsi üçün nəzərdə tutulub. Parkda hər gün istirahət edən şəhər sakinləri isə bildiriblər ki, məhv edilmə halları xüsusilə gecələr baş verir.
“Bir necə gündən bir gəlib ağacı gözaltı edirlər. Bu işlər əsasən də hava qaralanda baş verir. Müəyyən vaxt keçdikdən sonra isə və həmin ağacın yerində olmadığının şahidi oluruq. Sonra bəlli olur ki, ağacın quruması üçün onun dibinə xüsusi maddə tökürlər və bitkidə çürümə gedir. Sonrada qurudu adı ilə ağacı kəsirlər. Kim edir, niyə edir bilmirik”.
Sakinlər onu da bildiriblər ki, məsələ ilə bağlı parkda abadlıq işlərinə baxan şəxslərə müraciət ediblər, lakin onların şikayətinə baxan olmayıb. Onların sözlərinə görə, bu cür qanunsuzluğa heç bir nəzarət yoxdur. Rəsmi orqanlara müraciət etmədiklərini bildirən sakinlər ətraf mühitə bu formada ziyan vurulmasından şikayətçidirlər.
Sakinlərin haqlı narazılıqlarını nəzərə alaraq, Bakı Şəhər Abadlıqla əlaqə yaratmağa çalışdıq. Göndərilən görüntülərdə dəhşətli heç nəyin olmadığını bildirən qurum rəsmisi məsələyə belə aydınlıq gətirib.
“Biz sadəcə ağacların abadlaşdırılması prosesinə nəzarət edirik. Görüntüdə isə kəsilmiş bir ədəd ağac var o da köhnə ağacdır. Külək əsir, qocalır və nəticədə ağaclar qırılır. Biz də onları kəsməyə məcbur qalırıq”.
Qurumun rəsmisi bildirib ki, hər parkda sıx bitən ağaclar olmur. Onun sözlərinə görə, parkın ortasında açıqlıq sahə adi haldır və bu kəsilən ağaclarla əlaqəli deyil.
Sakinlər isə bildirir ki, ağacların kəsilməsi halı xüsusi ilə parkın kafe və restoranlar olan tərəfindədir. Onlar iddia edirlər ki, ağacların məhv edilməsi bununla bağlıdır. Qurum rəsmisi bu məsələyə də bu cür açıqlama verib:
“Parkın içərisində kafe,restoranların tikilməsi və ya ağacların məhvi onların ətrafından kəsilməsinə biz heç bir şərh verə bilmərik. Çünki park bizim balansımızda deyil. O park zabitlərin balansındadır, amma biz oranın abadlaşdırılmasına nəzarət edirik. Ağacların budanması, sulanması, təmizliyi bizim səlahiyyətmizdə olan işlərdir”.
Görülən odur ki, Bakının səfalı güşələrindən sayılan “Zabitlər” bağı öz qürub çağını yaşamağa başlayıb. Ortada məhv olunan yaşıllıq, günahı bir-birinin boynuna yıxan aidiyyatı qurumlar var. Bakı Abadlıq isə kəsilən kötük ağaclarını sulayıb, qulluq edəcək...
Ləman Abbaslı
Foto: Fariz Faiqoğlu
Əməkdaşımızın "Zabitlər" bağında fotoaparatın yaddaşına köçürdüyü şəkilləri təqdim edirik: